Thursday, May 23, 2024
Homeताजी बातमीपदवीधर आणि शिक्षक मतदारसंघासाठी आज मतदान

पदवीधर आणि शिक्षक मतदारसंघासाठी आज मतदान

१ डिसेंबर २०२०,
पदवीधर आणि शिक्षक मतदारसंघासाठी आज मंगळवारी मतदान सकाळ पासून सुरु झाले असून मतदार यादीतील गोंधळाच्या पार्श्वभूमीवर मतदानाचा टक्का वाढविण्याचे आव्हान असणार आहे. करोनाच्या सावटाखाली होणाऱ्या या निवडणुकीत करोनाबाधित रुग्णांसाठी सायंकाळी चार ते पाच ही वेळ ठेवण्यात आली असून, रुग्णालयांमध्ये दाखल असलेल्या मतदारांना मतदार केंद्रावर आणण्यासाठी खास वाहनांची व्यवस्था करण्यात आली आहे.

निवडणुकीच्या निमित्ताने महाविकास आघाडी पहिल्यांदाच एकत्र निवडणूक लढवित असल्याने त्यांच्यादृष्टीने इतिहास घडविणारी; तर भाजपच्या दृष्टिकोनातून निवडणूक प्रतिष्ठेची बनली आहे.

करोनाबाधित रुग्ण, क्वारंटाइन रुग्णांसाठी वेळ

या निवडणुकीसाठी मतदारांना सकाळी आठ ते सायंकाळी पाच वाजेपर्यंत मतदानाची वेळ देण्यात आली आहे. रुग्णालयांमध्ये उपचार घेत असलेले करोनाबाधित रुग्ण आणि क्वारंटाइन केलेले रुग्ण यांना शेवटच्या एक तासात मतदान करता येणार आहे.

मतदार याद्यांत गोंधळ

पदवीधर, शिक्षक मतदारसंघांसाठी सरासरी २२ टक्के मतदान होत असते. मात्र, यंदा राजकीय पक्षांनी निवडणुकीत रंगत आणली आहे. त्यामुळे मतदान वाढविण्यासाठी राजकीय पक्षांकडून प्रयत्न करण्यात येत आहेत. मात्र, मतदार याद्यांमध्ये मोठ्या प्रमाणात गोंधळ आहे. तसेच, अनेक मतदारांना दूर अंतरावरील मतदान केंद्र आली आहेत. त्यामुळे मतदान करताना मतदारांना त्रास होण्याची शक्यता निर्माण झाली आहे. मतदार यादीतील आठ हजार ८३४ मतदारांच्या नावासमोरील मोबाइल क्रमांक हे भाजपच्या कार्यकर्त्यांचे असल्याचे आणि दोन हजार २५७ मतदारांची नावे दुबार असून, त्यांची मतदार केंद्रे वेगवेगळी दाखविण्यात आल्याचा आरोप महाविकास आघाडीकडून करण्यात आला आहे.

ओळखपत्र म्हणून यापैकी एक पुरावा ग्राह्य

मतदान केंद्रावर मतदारांची ओळख पटविण्यासाठी मतदार ओळखपत्र नसलेल्या मतदारांना यापैकी कोणताही एक पुरावा ग्राह्य धरण्यात येणार आहे.

  • आधार कार्ड
  • वाहनचालक परवाना
  • पॅन कार्ड
  • पासपोर्ट
  • केंद्र, राज्य सरकार, सार्वजनिक उपक्रम, स्थानिक स्वराज्य संस्था किंवा खासगी औद्योगिक कंपन्यांनी वितरित केलेले सेवा ओळखपत्र

-शिक्षण संस्थेत कार्यरत असलेल्या शिक्षक मतदारांना वितरित केलेले सेवा ओळखपत्र

  • विद्यापीठांकडून वितरित केलेले पदवी किंवा पदविकेचे मूळ प्रमाणपत्र
  • सक्षम प्राधिकरणाद्वारे वितरित केलेले अपंगत्वाचे मूळ प्रमाणपत्र

‘नोटा’ पर्याय नाही

निवडणूक आयोगाने ११ सप्‍टेंबर २०१८ रोजी दिलेल्या निर्देशानुसार विधान परिषदेच्या निवडणुकीसाठी मतपत्रिकेवरील (None Of The Above- NOTA) ‘नोटा’ हा पर्याय वगळण्यात आला आहे. त्यामुळे मतदारांना या पर्यायाचा अवलंब करता येणार नाही.

जम्बो मतपत्रिका

पदवीधर मतदारसंघासाठी ६२ उमेदवार असल्याने ही मतपत्रिका जम्बो मतपत्रिका झाली आहे. त्यामुळे मतदारांना पसंतिक्रम लिहिल्यानंतर मतपत्रिका मतपेटीत टाकताना कसरत करावी लागणार आहे. १०० मतपत्रिकांचे वजन सुमारे आठ किलो होणार आहे. त्यामुळे मतपत्रिकांच्या पेट्यांची संख्या वाढविण्यात आली आहे. शिक्षक मतदारसंघामध्ये ३५ उमेदवार असल्याने तुलनेने कमी आकाराची मतपत्रिका आहे.

असे करा मतदान

  • मतदारांनी मतपत्रिकेतील पसंतीच्या उमेदवारासमोर पसंतिक्रम नोंदवावा.
  • मतपत्रिकेसोबत दिलेल्या जांभळ्या शाईच्या स्केचपेनने मत नोंदविणे.

पहिल्या पसंतीच्या उमेदवारच्या नावासमोर पसंतिक्रम नोंदविताना रकान्यामध्ये १ हा अंक लिहावा.

  • पसंतिक्रमाचे अंक हे १,२,३ या प्रकारे नोंदवावेत. एक, दोन, तीन असे लिहू नये.
  • मराठी, इंग्रजी किंवा रोमन पद्धतीनुसार अंक लिहिण्याची मुभा आहे.
  • पहिला पसंतिक्रम नोंदविणे सक्तीचे. अन्य पसंतिक्रम नोंदवायचे की नाहीत, हे ऐच्छिक आहे.

पॉइंटर

  • विभागात पदवीधर मतदारसंघासाठी १२०२; तर शिक्षक मतदारसंघासाठी ३६७ मतदान केंद्रे .
  • मतदान प्रक्रियेसाठी पदवीधर मतदारसंघासाठी मतदान केंद्राध्‍यक्ष, मतदान अधिकारी, सूक्ष्‍म निरीक्षक यांच्‍यासह सात हजार ४१; तर शिक्षक मतदारसंघासाठी तीन हजार ११६ असे दहा हजार १५७ अधिकारी आणि कर्मचारी.
  • दोन हजार ९१७ वैद्यकीय अधिकारी आणि कर्मचाऱ्यांची नेमणूक.
  • मतदान अधिकारी आणि सुरक्षा अधिकाऱ्यांसाठी मास्क, सॅनिटायझर, फेसशिल्ड, हातमोजे असलेले किट देण्‍यात आली आहेत.
  • प्रत्येक केंद्रावर मास्क, थर्मल गन, सॅनिटायझर, लिक्विड सोपची व्यवस्था.
  • मतदान केंद्रावर मतदार सहायक कक्ष स्थापन.
RELATED ARTICLES
- Advertisment -
Google search engine
Google search engine

Most Popular

Recent Comments