राजधानी मॉस्कोमधील अमेरिकन दूतावासातील उपउच्चाधिकाऱ्याची रशियाने गुरुवारी हकालपट्टी केली. यामुळे युक्रेन वादावरून दोन महासत्तांमध्ये राजनैतिक संघर्ष उभा ठाकला आहे. या हकालपट्टीचे कोणतेही कारण रशियाने दिलेले नाही.
गेल्या काही दिवसांपासून अमेरिकेचे अध्यक्ष जो बायडेन उघडपणे युक्रेनवरून रशियाला इशारा देत आहेत. युक्रेनवर आक्रमण केल्यास अमेरिका प्रत्युत्तर देईल, असा थेट इशाराही बायडेन यांनी सलग बुधवार व गुरुवारी दिला. एकीकडे नाटो देशही रशियाविरोधात एकी दाखवत आर्थिक व राजनैतिक निर्बंधांची तयारी करीत असतानाच रशियानेच गुरुवारी पुढचे पाऊल उचलत अमेरिकेला लक्ष्य केले. मॉस्कोतील अमेरिकेच्या दूतावासातील दुसऱ्या क्रमांकाचे राजनैतिक अधिकारी, उपउच्चाधिकारी बार्ट गॉर्मन यांची रशियाने हकालपट्टी केली. गॉर्मन हे गेली तीन वर्षे रशियातील अमेरिकन दूतावासात नियुक्तीवर आहेत. त्यांच्याकडे अमेरिकेचा ओपन व्हिसा आहे. विशेष म्हणजे रशियाच्या परराष्ट्र मंत्रालयाने याबाबत कोणतीही माहिती जाहीर केली नसून, अमेरिकेच्या दूतावासानेच रशियन वृत्तसंस्थेला या घडामोडीची माहिती दिली.
युक्रेन सीमेवरील फौजा मागे घेत असल्याचे रशिया वारंवार जाहीर करीत असला तरी अमेरिका व नाटो देश सातत्याने त्यावर शंका उपस्थित करीत आहेत. ‘अजूनही अनेक रशियन सैनिक युक्रेनच्या सीमेनजीक आहेत. लढाऊ विमाने युक्रेन सीमेवर घिरट्या घालत आहेत. काळ्या समुद्राजवळही रशियाने कुमक वाढवली आहे. तेथे रक्ताचा साठा वाढवण्यात येत आहे. रशियाची जर युक्रेन सीमेवरून माघार घेण्याची तयारी असेल, तर ही तयारी काय दर्शवते’, याकडे अमेरिकेचे संरक्षणमंत्री लॉइड ऑस्टिन यांनी लक्ष वेधले.
‘कोणत्याही क्षणा युक्रेनवर आक्रमण’
रशिया कुठल्याही क्षणी युक्रेनवर आक्रमण करू शकतो, असा अंदाज अमेरिकेने व्यक्त केला आहे. याच पार्श्वभूमीवर, अमेरिकेचे अध्यक्ष जो बायडन यांनी उपाध्यक्ष कमला हॅरिस आणि परराष्ट्रमंत्री टोनी ब्लिंकेन यांना म्युनिक परिषदेसाठी पाठवून तिथे जागतिक नेत्यांना रशियाविरुद्ध एकजूट करण्याचे प्रयत्न केले जाणार असल्याचे जाहीर केले आहे. ‘रशिया कोणताही बनाव रचून हल्ल्याची संधी साधू शकतो. बनावट व्हीडिओ, रासायनिक अस्त्रांचा सैनिकांवर हल्ला झाल्याचे खोटे सांगून तो हल्ला करू शकतो. रशियाकडून खोटे वृत्त प्रसृत केले जाऊ शकते. तेव्हा सर्वांनी डोळे उघडे ठेवून सतर्क राहायला हवे,’ असे व्हाइट हाऊसच्या प्रवक्त्या जेन पास्की यांनी पत्रकारांना सांगितले. हॅरिस आणि ब्लिंकेन हे जर्मनीला १८ ते २० फेब्रुवारी दरम्यान होणाऱ्या म्युनिक सुरक्षा परिषदेसाठी रवाना होणार आहेत. तिथे युक्रेनच्या सार्वभौमत्त्वाच्या मुद्द्यावर युरोपिय देशांची एकजूट केली जाणार असल्याचे पास्की यांनी सांगितले.
