३ ऑगस्ट २०२१,
जगज्जेत्या बेल्जियमने भारताचा ५-२ असा पराभव करत अंतिम फेरीत धडक मारली. आता भारतीय संघ कास्य पदकासाठी लढले. ऑलिम्पिकमध्ये भारताने आठ सुवर्णपदक जिंकली आहेत. पण गेल्या ४१ वर्षात भारताला एकही पदक जिंकला आले नाही. १९८० साली भारताने मॉस्को ऑलिम्पिकमध्ये अखेरचे पदक जिंकले होते. कास्य पदकासाठी भारतीय संघ ऑस्ट्रेलिया आणि जर्मनी यांच्यातील पराभूत संघाविरुद्ध खेळेल.
पहिल्या क्वॉर्टरमध्ये एक मिनिट चार सेंकदाला मिळालेल्या पहिल्या पेनल्टी कॉर्नरवर बेल्जियमने पहिला गोल करून भारताविरुद्ध १-० अशी आघाडी घेतली. दोन्ही संघांनी पहिल्यापासून चांगला खेळ केला. त्यानंतर भारताच्या हरमनप्रीत सिंगने सातव्या मिनिटाला मिळालेल्या पेनल्टी कॉर्नरवर गोल करून संघाला १-१ अशी बरोबरी करून दिली. पहिल्या गोलनंतर एकाच मिनिटाता आठव्या मिनिटाला मनदीप सिंगने रिव्हर्स स्टिकने गोल करून भारताला २-१ अशी आघाडी करून दिली. मनदीपने बेल्जियमचा गोलकीपर वेनस्चला चकवले. भारतीय संघाने पहिल्या १५ मिनिटाचा खेळ संपला तेव्हा २-१ अशी आघाडी घेऊन वर्ल्ड चॅम्पियन बेल्जियमवर दबाव ठेवला. दुसऱ्या क्वॉर्टरमध्ये बेल्जियमने दुसरा गोल करून २-२ अशी बरोबरी केली. पहिल्या हाफचा खेळ संपला तेव्हा ही बरोबरी कायम होती. या हाफमध्ये दोन्ही संघात चुरस पाहायला मिळाली. दोन्ही संघा एकमेकांना संधी देत नव्हते. त्यामुळे मिळालेल्या संधीचा जास्ती जास्त फायदा करुन घेण्याकडे त्यांचा कल होता.
दुसऱ्या हाफमध्ये तिसऱ्या क्वॉर्टरमध्ये दोन्ही संघांनी एकमेकांना कोणतीही संधी दिली नाही. त्यामुळे गोल २-२ असा बरोबरीत राहिला. चौथ्या क्वॉर्रटरमध्ये बेल्जियमने तिसरा गोल करून ३-२ अशी आघाडी मिळवली. त्यानंतर बेल्जियमने चौथा गोल करून ४-२ अशी मोठी आघाडी मिळून दिली. अखेरच्या मिनिटात बेल्जियमने पाचवा गोल करून ५-२ अशा विजय मिळवला. बेल्जियमने सलग दुसऱ्यांदा ऑलिम्पिकिच्या फायनलमध्ये प्रवेश केला आहे.
