पुणे मेट्रोच्या भुयारी मार्गावरील शिवाजीनगर येथील मेट्रो स्टेशन सर्वप्रथम पूर्ण होणार आहे. येत्या नोव्हेंबर अखेरीस ते पूर्ण करण्याचे उद्दिष्ट ‘महाराष्ट्र मेट्रो रेल्वे कॉर्पोरेशन’ने (महामेट्रो) निश्चित केले आहे. या स्टेशनसाठी पुण्यातील जुन्या ऐतिहासिक वास्तू आणि पुरातन वाडे-मंदिरे यांची ओळख सांगणारी रचना साकारण्यात येणार आहे. स्टेशनच्या बाहेरील संपूर्ण परिसर याच पद्धतीने साकारण्यात येणार असून, रेल्वे आणि ‘पीएमपी’च्या प्रवाशांना थेट ‘मेट्रो’शी जोडण्याची योजना आहे.
शिवाजीनगर येथील मेट्रो स्टेशनचे ८५ टक्के काम पूर्ण झाले असून, अंतिम टप्प्यातील कामे पुढील महिना ते दीड महिन्यांत पूर्ण करून नोव्हेंबरअखेरीस भुयारी मार्ग मेट्रो सुरक्षा आयुक्तांच्या (सीएमआरएस) तपासणीसाठी सज्ज ठेवण्यात येईल, अशी ग्वाही ‘महामेट्रो’चे व्यवस्थापकीय संचालक ब्रिजेश दीक्षित यांनी सोमवारी दिली. पिंपरी-चिंचवड ते शिवाजीनगर धान्य गोदाम (सिव्हिल कोर्ट) आणि वनाझ ते सिव्हिल कोर्ट असे दोन्ही मार्ग लवकरच पूर्ण करण्याचा मानसही दीक्षित यांनी व्यक्त केला. ते म्हणाले, ‘मेट्रोच्या भुयारी स्टेशनपैकी शिवाजीनगर स्टेशन सर्वप्रथम पूर्ण होणार आहे. या स्टेशनला ये-जा करण्यासाठी सध्या दोन ठिकाणी सुविधा करण्यात आली आहे. त्याशिवाय, भविष्यात आकाशवाणीच्या जवळूनही प्रवाशांना थेट स्टेशनपर्यंत पोहोचता येणार आहे.’
मेट्रो स्टेशनसाठी तीन मार्ग
- शिवाजीनगर रेल्वे स्टेशन आणि ‘पीएमपी’ स्थानकाकडून येणाऱ्या प्रवाशांना मेट्रोशी जोडण्यासाठी एक मार्ग.
- साखर संकुलकडून येणाऱ्या प्रवाशांना थेट मेट्रो स्टेशनमध्ये प्रवेश करण्यासाठी स्वतंत्र मार्ग.
- आकाशवाणी आणि हिंजवडी-शिवाजीनगर मेट्रोच्या प्रवाशांना शिवाजीनगरला येण्यासाठी वेगळा मार्ग.
- या मेट्रो स्टेशनसाठी पाच लिफ्ट, १२ सरकते जिने (एस्कलेटर) असतील.
- एका तासात ३० हजार प्रवासीक्षमतेचा विचार करून स्टेशनची रचना करण्यात आली आहे.
‘पीसीएमसी’ ते सिव्हील कोर्ट या मार्गावरील खडकी आणि रेंजहिल मेट्रो स्टेशनसाठी जागा खूपच उशिरा मिळाल्या. दापोडी स्टेशनचे काम ९० टक्के झाले असून, इतर स्टेशनची कामेही खूप पुढे गेली आहेत. मात्र, खडकी आणि रेंजहिल मेट्रो स्टेशनच्या जागा उशिराने मिळाल्याने त्यांची कामे अपूर्ण आहेत. त्यामुळे नोव्हेंबर अखेरपर्यंत ही दोन स्टेशन वगळून पिंपरी ते सिव्हिल कोर्ट हा मार्ग सुरू करण्याचे संकेतही दीक्षित यांनी दिले.
राज्य मार्ग परिवहन महामंडळाची (एसटी) जागा घेऊन शिवाजीनगर मेट्रो स्टेशनचे बांधकाम करण्यात आले आहे. या ठिकाणी मेट्रो आणि एसटी मिळून एकत्रित स्टेशनची निर्मिती होणार होती. एसटी महामंडळाने मेट्रोसोबत स्टेशन उभारण्याऐवजी स्वतः तयार करणार असल्याचे सांगितले. मात्र, अजूनही एसटीने नक्की काय करणार असल्याचे स्पष्ट केले नसल्याने चर्चाच सुरू आहे. अंतिम निर्णय त्यांनी घ्यायचा आहे, असे सांगून दीक्षित यांनी एसटीच्या जागेचे काय, हा प्रश्न महामंडळाच्या कोर्टात ढकलला.
