३० जानेवारी २०२१,
देशाची पहिली ‘कॉर्पोरेट ट्रेन’ म्हणून ओळखली जाणारी ‘तेजस एक्सप्रेस’ पुन्हा एकदा रुळावर दाखल होणार आहे. १४ फेब्रुवारी २०२१ पासून तेजस एक्सप्रेसचं संचालन सुरू होणार आहे. तेजस एक्सप्रेस लखनऊ – नवी दिल्ली तसंच अहमदाबाद – मुंबई या दोन्ही मार्गांवर चालणार आहे. इंडियन रेल्वे केटरिंग अँड टुरिझम कॉर्पोरेशन लिमिटेड (IRCTC) कडून देण्यात आलेल्या माहितीनुसार, तेजस एक्सप्रेस आठवड्यातून चार दिवस म्हणजेच शुक्रवार, शनिवारी, रविवार आणि सोमवारी चालणार आहे.
२९ जानेवारीपासून तेजस एक्सप्रेसच्या बुकिंगलाही सुरुवात करण्यात आल्याची माहिती आयारसीटीसीनं दिलीय. प्रवासा दरम्यान सोशल डिस्टन्सिंग तसंच इतर करोना नियमांचं पालन अनिवार्य असेल रेल्वे बोर्डाकडून नवी दिल्ली ते लखनऊ दरम्यान धावणाऱ्या तेजस एक्सप्रेसचं संचालन २३ नोव्हेंबर २०२० रोजी तर मुंबई ते अहमदाबाद दरम्यान धावणाऱ्या रेल्वेचं संचालन २४ नोव्हेंबर रोजी बंद करण्यात आलं होतं. करोना काळात तेजस एक्सप्रेसच्या प्रवाशांची संख्या घटल्यानं हा निर्णय घेण्यात आल्याचं सांगण्यात आलं होतं.
या अगोदर करोना लॉकडाऊन काळात तेजस एक्सप्रेसचं संचालन १९ मार्चपासून जवळपास सात महिने बंद राहिलं होतं. त्यानंतर रेल्वेकडून १७ ऑक्टोबर २०२० रोजी नवरात्रीच्या पहिल्या दिवशी तेजस एक्सप्रेसचं पुन: संचालन सुरू झालं. जवळपास एक महिना रुळावर धावल्यानंतर प्रवासी नसल्यानं तेजस एक्सप्रेसचं संचालन पुन्हा बंद करण्यात आलं होतं.
ऑक्टोबर २०१९ पासून देशात पहिल्या खासगी रेल्वे असलेल्या तेजस एक्सप्रेसची सुरुवात करण्यात आली होती. या रेल्वेच्या संचालनाची जबाबदारी आयआरसीटीसीकडे सोपवण्यात आलीय. ऑक्टोबर २०१९ मध्ये दिल्ली – लखनऊ – दिल्ली रेल्वे सुरू झाल्यानंतर मुंबई – अहमदाबाद – मुंबई रेल्वेचं संचालन जानेवारी २०२० मध्ये सुरू करण्यात आलं होतं.
