१ ऑगस्टपासून पुणे, पिंपरी-चिंचवड शहर आणि जिल्ह्यात प्रस्तावित करण्यात आलेली रिक्षाची भाडेवाढ स्थगित करण्याचा निर्णय घेण्यात आला आहे. . प्राधिकरणाच्या पुढील बैठकीत भाडेवाढीचा निर्णय घेण्यात येणार आहे. दरम्यान, ‘खटुआ समितीच्या समीकरणानुसार दरवाढ द्यावी’, अशी मागणी रिक्षा पंचायतीने केली होती.
पुणे शहर आणि जिल्ह्यात रिक्षाच्या भाडेदरात वाढ करण्याचा निर्णय प्रादेशिक परिवहन प्राधिकरणाने २५जुलैला घेतला. दीड किलोमीटरच्या पहिल्या टप्प्यासाठी दोन रुपये आणि त्यानंतर प्रति किलोमीटरसाठी एक रुपया अशी दरवाढ केली आहे. हे नवीन दर एक ऑगस्टपासून लागू होणार होते. त्यानुसार पहिल्या दीड किमीसाठी २१ रुपयांऐवजी २३ रुपये आणि त्यानंतर प्रति किमीसाठी १४ रुपयांऐवजी १५ रुपये भाडे द्यावे लागणार होते. मात्र, प्रादेशिक परिवहन प्राधिकरणाने खटुवा समितीच्या समीकरणानुसार रिक्षा दरवाढ केली नाही, असा दावा करून समितीच्या समीकरणानुसार दरवाढ देण्याची मागणी रिक्षा पंचायतीच्या शिष्टमंडळाने जिल्हाधिकारी राजेश देशमुख यांच्याकडे केली. त्यानुसार रिक्षा दरवाढ आणि सीएनजी पुरवठा यांवर चर्चा करण्यासाठी जिल्हाधिकाऱ्यांनी गुरुवारी बैठक बोलावली होती. बैठकीत भाडेवाढ तूर्त स्थगित करण्याचा निर्णय घेण्यात आला.
