युक्रेनविरोधात बलाढ्य रशियाने युद्धासाठी दंड थोपटले असून त्याचे पडसाद जगभरातील भांडवली बाजारांवर उमटले आहे.अमेरिका, युरोपासह आशियातील प्रमुख भांडवली बाजारात आज मोठी घसरण झाली आहे. युद्धाच्या शक्यतेने धसतवलेल्या गुंतवणूकदारांनी आज बाजारात चौफेर विक्रीचा सपाटा लावला ज्यामुळे मुंबई शेअर बाजाराचा सेन्सेक्स १००० अंकांनी कोसळला. निफ्टी २८० अंकांनी घसरला असून यामुळे क्षणात दोन ते अडीच लाख कोटी रुपयांचा चुराडा झाला.
बाजार सुरु होताच गुंतवणूकदारांनी विक्रीचा सपाटा लावला आहे. सेन्सेक्स मंचावरील सर्वच्या सर्व ३० प्रमुख शेअरच्या किंमतीत मोठी घसरण झाली आहे. यात सन फार्मा, मारुती, एनटीपीसी, विप्रो, आयटीसी, पॉवरग्रीड, एचयूएल, एसबीआय, रिलायन्स इंडस्ट्रीज, टीसीएस या सारख्या महत्वाच्या शेअरमध्ये मोठी पडझड पाहायला मिळत आहे.
राष्ट्रीय शेअर बाजारात सर्वच क्षेत्रीय निर्देशांकात घसरण झाली आहे. यात निफ्टी बँक, निफ्टी ऑटो, निफ्टी फायनान्शिअल सर्व्हिसेस, निफ्टी मिडिया, निफ्टी पीएसयू बँक या निर्देशांकात २ टक्क्यांपर्यंत घसरण झाली आहे. सध्या सेन्सेक्स ५६७४२ अंकावर व्यवहार करत असून त्यात ९४० अंकांची घसरण झाली आहे. निफ्टी १६९३० अंकांवर असून त्यात २७६ अंकांची मोठी पडझड झाली आहे.
निफ्टीवर वोडाफोन, धनी सर्व्हिसेस, इंडियाबुल्स हाऊसिंग, अदानी पॉवर, युनियन बँक, पीएनबी, बँक ऑफ बडोदा आदी शेअर घसरले आहेत. रशिया-युक्रेन संघर्षाने परदेशी संस्थात्मक गुंतवणूकदार धास्तावले आहेत. त्यांनी उदयोन्मुख बाजारांतून पैसे काढून घेण्यास सुरुवात केली आहे. त्यामुळे शेअर बाजारात मोठी पडझड दिसून आल्याचे जिओजित फायनान्शिअल सर्व्हिसेसचे मुख्य गुंतवणूक रणनीतीकार डॉ. व्ही. के. विजयकुमार यांनी सांगितले.
रशियाचे राष्ट्राध्यक्ष व्लादीमीर पुतीन यांनी नुकताच राष्ट्राला संबोधित करत युद्धासाठी सज्ज असल्याचे म्हटलं होते. पूर्व युक्रेनमध्ये रश्याने मोठ्या प्रमाणात लष्करी फौजफाटा तैनात केला आहे. त्यामुळे युद्ध होण्याची शक्यता वाढली आहे. या पार्श्वभूमीवर आज कमॉडिटी बाजारात कच्च्या तेलाचा भाव ४ टक्क्यांनी वाढला. ब्रेंट क्रूडचा भाव ९७.३५ डॉलर प्रती बॅरल झाला आहे. आशियातील सिंगापूर, जपान, शांघाई या शेअर बाजारातील निर्देशांकात मोठी पडझड झाली. सोमवारी अमेरिकेतील शेअर निर्देशांक कोसळले होते.
