पिंपरी-चिंचवड महानगरपालिकेच्या वतीने व्हेरॉक वेंगसरकर क्रिकेट अकॅडमीत नुकत्याच उभारण्यात आलेल्या प्रकाशझोत यंत्रणेची यशस्वी चाचणी पार पडली असून, आगामी हंगामात प्रथम श्रेणीतील प्रकाशझोतातील सामने खेळवले जाण्यासाठी मैदान सज्ज झाले आहे.
या उत्कृष्ट सुविधांबद्दल पिंपरी-चिंचवड महापालिकेचे विशेष आभार मानावे लागतील, कारण त्यांनी येथे आंतरराष्ट्रीय दर्जाच्या अनेक सुविधा उपलब्ध करून दिल्या आहेत. प्रकाशझोत यंत्रणेसह पावसाळ्यात सरावासाठी सहा कृत्रिम खेळपट्ट्यांसह इनडोअर हॉल, आणि सामने सुरू असताना इतर राज्यांतील खेळाडू, व्यवस्थापक, पंच यांच्यासाठी पॅव्हेलियनमध्ये १८ खोल्यांची निवासाची सोय करण्यात आली आहे.
या सुविधांमुळे खेळाडूंना दर्जेदार वातावरण मिळत असून, यामुळे त्यांच्या कामगिरीत लक्षणीय सुधारणा दिसून आली आहे. व्हेरॉक इंजिनिअरिंग कंपनीचे प्रायोजकत्व हेही महत्त्वाचे ठरले आहे. त्यांच्या सहकार्यामुळे अकॅडमीतील खेळाडूंना मोफत प्रशिक्षण मिळत असून, यातील अनेक खेळाडू प्रथम श्रेणीतील सामन्यांसाठी निवडले गेले आहेत.
प्रत्येक हंगामात अकॅडमीतून विविध वयोगटांसाठी सुमारे दहा स्पर्धांचे आयोजन केले जाते. तसेच, महिलांच्या क्रिकेटलाही विशेष प्राधान्य दिले जात आहे.
या सर्व बाबींचा एकत्रित परिणाम म्हणून आज व्हेरॉक वेंगसरकर क्रिकेट अकॅडमी ही महाराष्ट्रातील आघाडीची आणि विश्‍वासार्ह क्रिकेट अकॅडमी म्हणून ओळखली जात आहे.
