कुदळवाडी चिखली परिसरात नोटीस दिलेल्या धार्मिक स्थळांवरील अतिक्रमण कारवाई लगेचच करण्यात येणार नाही. सर्वोच्च न्यायालय तसेच राज्य सरकारच्या मार्गदर्शक सूचनांच्या अनुषंगाने तसेच यासंदर्भामध्ये प्राप्त झालेल्या खुलाश्यांवर संपूर्ण सुनवणी प्रक्रिया पार पाडूनच पुढील कारवाई केली जाईल असे स्पष्ट आश्वासन पिंपरी चिंचवड महानगरपालिकेचे आयुक्त श्री शेखर सिंह यांनी आज मज्जिद और मदरसा ॲक्शन कमिटीच्या संयुक्त शिष्ट मंडळास दिले. 

पिंपरी चिंचवड महानगरपालिकेमध्ये आयुक्त शेखर सिंग यांच्या समवेत ॲक्शन कमिटीचे राहुल डंबाळे , फजल शेख , शहाबुद्दीन शेख , नियाज सिद्दीकी , बाबा कांबळे , गुलजार शेख , युसुफ कुरैशी , मौलाना नय्यर नुरी , कारी इक्बाल उस्मानी , सय्यद गुलाम रसुल , याकुब शेख , रशिद सय्यद , शकुरुल्ला पठाण , वाहीद कुरैशी , 

इत्यादी मान्यवरांच्या उपस्थितीमध्ये पोलीस उपायुक्त श्री शिवाजी पवार ,  सहाय्यक पोलीस आयुक्त सचिन हिरे व वरिष्ठ पोलीस निरीक्षक यांच्या उपस्थितीत संयुक्त बैठक पार पडली. यावेळी नोटीस धारक मशिदींच्या प्रतिनिधींनी संपूर्ण हकीकत व्यक्त करत सर्व मशिदी या खाजगी जागेवर असून त्या राज्य शासनाच्या धोरणानुसार नियमित होण्यास पात्र असून तशी कार्यवाही आमच्याकडून सुरुवात करण्यात आली आहे. त्यामुळे सदर धार्मिक स्थळे अधिकृत करून द्यावी अशी विनंती केली.

यावेळी राज्य शासनाने यापूर्वीच छत्रपती  , कोल्हापूर , मीरा-भाईंदर, मुंबई , नागपुर इत्यादी महानगरपालिका क्षेत्रांमधील हजारो धार्मिक स्थळे नियमित केल्याची बाब आयुक्तांच्या निदर्शनास आणून दिली. त्यानंतर या सर्व बाबींची सविस्तर माहिती घेऊन जी धार्मिक स्थळे नियमानुकूल होणे शक्य असतील त्यांच्याबाबत सकारात्मक निर्णय घेऊ असे देखील स्पष्ट आश्वासन आयुक्तांनी दिले. 

दरम्यान पिंपरी चिंचवड महानगरपालिकेने धार्मिक स्थळांना कारवाईबाबत दिलेली नोटीस ही अत्यंत चुकीची असून इतर महापालिकांप्रमाणे धार्मिक स्थळे नियमित करण्यासाठी प्राधान्य देणे आवश्यक असल्याचे मत यावेळी शिष्टमंडळातील सर्वच पदाधिकाऱ्यांनी केले. दरम्यान महानगरपालिकेने एकतर्फी कारवाई केल्यास कायदा सुव्यवस्थेचा प्रश्न देखील निर्माण होऊ शकतो अशी भीती देखील यावेळी व्यक्त केली गेली. दरम्यान सध्या भारत-पाक युद्धाची पार्श्वभूमी लक्षात घेऊन शहरांमध्ये अन्य कोणताही तनाव निर्माण होऊ नये या पार्श्वभूमीवर ही कारवाई रद्द करावी अशी आग्रही विनंती करण्यात आली होती. 

दरम्यान नोटीस दिलेल्यां पैकी पाच मशिदींना छत्रपती संभाजी नगर  येथील वक्फ ट्रीब्युनल बोर्डाने कारवाई करण्यास मनपाला स्थगिती आदेश दिलेले आहेत.

दरम्यान धार्मिक स्थळे नियमातून करण्यासंदर्भामध्ये नोडल अधिकारी म्हणून शहर अभियंता मकरंद निकम यांचेशी संपर्क साधण्याबाबत शिष्टमंडळास आयुक्तांनी सांगितले आहे. 

पिंपरी-चिंचवड – भारतीय जनता पक्षाने राज्यातील संघटन अधिक बळकट करण्यासाठी विविध शहरांतील अध्यक्षपदाच्या निवडी जाहीर केल्या असून, पिंपरी-चिंचवड शहराध्यक्षपदी माजी नगरसेवक शत्रुघ्न काटे यांची नियुक्ती करण्यात आली आहे.

राज्यभरातील संघटनात्मक फेरबदलांच्या पार्श्वभूमीवर, भाजपने पुणे, नाशिक, औरंगाबाद, कोल्हापूर, ठाणे, नागपूर आदी प्रमुख शहरांसह पिंपरी-चिंचवडमध्येही नवीन नेतृत्वाची घोषणा केली आहे. यामुळे आगामी स्थानिक स्वराज्य संस्थांच्या निवडणुकांसाठी पक्षाचे खंबीर संघटन उभे करण्याचा भाजपचा प्रयत्न स्पष्ट झाला आहे.

पिंपरी-चिंचवडमध्ये काटे यांची निवड ही संघटनेतील अनुभव आणि स्थानिक पातळीवरील सक्रियतेचा गौरव मानली जात आहे. आगामी महानगरपालिका निवडणुकीत, पक्षाचं वर्चस्व टिकवून ठेवण्याचं मोठं आव्हान आता त्यांच्या खांद्यावर आहे.

शत्रुघ्न काटे यांना भाजपमधील जुने आणि नवे कार्यकर्ते यांच्यात सेतू म्हणून पाहिले जाते. पक्ष संघटना मजबूत करणे, जनतेशी थेट संवाद साधणे आणि आगामी राजकीय रणनिती आखणे या बाबतीत त्यांच्याकडून पक्षश्रेष्ठींनी अपेक्षा ठेवलेल्या आहेत.

पिंपरी चिंचवड महानगरपालिकेच्या ‘पीसीएमसी @ 50’ व्हिजन मोहिमेंतर्गत नागरिक सर्वेक्षणाची सुरुवात पिंपरी चिंचवड शहराच्या विविध विभागांमध्ये झाली आहे.  स्वयंसहाय्यता गटांच्या २५० हून अधिक प्रशिक्षित महिलांमार्फत हे सर्वेक्षण करण्यात येत आहे. २०३२ मध्ये पिंपरी चिंचवड महानगरपालिकेच्या स्थापनेला ५० वर्ष पूर्ण होत आहेत.  महापालिकेच्या या सुवर्ण महोत्सवाच्या पार्श्वभूमीवर शहराच्या विकास धोरणासाठी जवळपास २० हजार  नागरिकांचा फीडबॅक गोळा करणे, हे या सर्वेक्षणाचे उद्दिष्ट आहे.

पिंपरी चिंचवड महापालिका समाज विकास विभाग टाटा स्ट्राईव्हच्या सहकार्याने सक्षमा उपक्रमा अंतर्गत ही मोहिम राबविण्यात येत आहे. यासाठी महापालिकेचा सिटी ट्रान्सफॉर्मेशन उपक्रम (सीटीओ) सहकार्य करीत आहे. या सर्वेक्षणात निवासी व्यक्ती, व्यावसायिक आस्थापने आणि विविध संस्था येथील नागरिकांचा फीडबॅक गोळा केला जाणार आहे.

नागरिक या सर्वेक्षणात ऑनलाइन देखील सहभागी होऊ शकतात. महापालिकेच्या विविध विभाग कार्यालयांमध्ये आणि तसेच शहरातील विविध ठिकाणी याबाबत क्युआर कोड लावण्यात आले आहेत. हा कोड स्कॅन करून नागरिकांना सर्वेक्षणात ऑनलाइन सहभागी होता येईल. याशिवाय महापालिकेच्या संकेतस्थळाला भेट देऊन  सर्वेक्षणात सहभागी होता येईल.

“ पिंपरी चिंचवड शहराच्या भवितव्याला आकार देण्यासाठी ‘पीसीएमसी @ 50’ व्हिजन हा एक महत्त्वपूर्ण उपक्रम आहे. या अनुषंगाने करण्यात येणाऱ्या सर्वेक्षणात जास्तीतजास्त नागरिकांनी सहभागी व्हावे. सर्वेक्षणासाठी येणाऱ्या स्वयंसहाय्यता गटांच्या महिलांना सहकार्य करावे. तसेच सर्वेक्षण फॉर्म भरताना तुमचे योग्य मत नोंदवा. तुमचे मत आपल्या शहराच्या भवितव्यासाठी महत्त्वाचे आहे.”

– शेखर सिंह, आयुक्त तथा प्रशासक, पिंपरी चिंचवड महानगरपालिका

पिंपरी-चिंचवड शहरात सोसायट्यांना कडक उन्हाळ्याच्या पार्श्वभूमीवर पुरेशा पाण्याचा तुटवडा भासत असल्याने आमदार शंकर जगताप यांनी बैठक घेत प्रशासनाला चांगलेच सुनावले. पाण्याची गळती आणि अपव्यय रोखून नागरिकांना त्वरित समाधानकारक पाणीपुरवठा करण्याचे स्पष्ट निर्देश त्यांनी दिले.

पिंपरी-चिंचवड शहरातील अनेक सोसायट्यांना सध्या निर्धारित कोट्यापेक्षा कमी पाणी मिळत असून, नागरिकांना टँकरवर अवलंबून राहण्याची वेळ आली आहे. कडक उन्हाळ्यात पाण्याच्या या संकटामुळे नागरिक त्रस्त झाले आहेत. या पार्श्वभूमीवर आमदार शंकर जगताप यांनी चिंचवडगावात पाण्याच्या टाकी खाली महत्त्वपूर्ण बैठक घेतली.

या बैठकीत जगताप यांनी पाणीपुरवठा विभागाच्या अधिकाऱ्यांना स्पष्ट शब्दांत सुनावले. पाण्याची गळती, गैरवापर व अपव्ययाबाबत त्यांनी नाराजी व्यक्त करत तातडीने उपाययोजना राबवण्याचे आदेश दिले. व्यावसायिक वापराच्या तुलनेत पिण्याच्या पाण्याला पूर्ण प्राधान्य देण्याचे निर्देश त्यांनी दिले.

“पिण्याचे पाणी हा नागरिकांचा मूलभूत हक्क आहे. त्यामुळे प्रत्येक नागरिक आणि सोसायटीला नियमानुसार व पुरेसे पाणी मिळणे आवश्यक आहे. त्यासाठी प्रशासनाने तातडीने कामाला लागावे,” असे स्पष्ट निर्देश आमदार जगताप यांनी दिले.

बैठकीस भाजपा जिल्हा सरचिटणीस नामदेव ढाके, माजी उपमहापौर सचिन चिंचवडे, माजी नगरसेवक सुरेश भोईर, माजी नगरसेविका अश्विनी चिंचवडे, माधुरी कुलकर्णी, माजी स्वीकृत नगरसेवक बिभीषण चौधरी, विठ्ठल भोईर, भाजपा उपाध्यक्ष शेखर चिंचवडे तसेच इतर स्थानिक पदाधिकारी मोठ्या संख्येने उपस्थित होते.

प्रशासनातर्फे पाणीपुरवठा विभागाचे मुख्य अभियंता प्रमोद ओंबासे, सह शहर अभियंता अजय सूर्यवंशी, कार्यकारी अभियंता दीपक पाटील, उपअभियंते चंद्रकांत मोरे व देसाई, कनिष्ठ अभियंता साकेत पावरा तसेच रघुनाथ शेमले, राहुल पाटील, सागर पाटील, संदीप ढेपले, शरद मोरे आदी अधिकारी व कर्मचारी उपस्थित होते.

या बैठकीत नागरिकांचे प्रश्न गांभीर्याने घेत तातडीने त्यावर कारवाई करण्याचे आश्वासनही अधिकाऱ्यांनी दिले. यामुळे नागरिकांत समाधानाचे वातावरण निर्माण झाले आहे.

महाराष्ट्र माध्यमिक व उच्च माध्यमिक मंडळाने आज बारावीच्या परीक्षेचे निकाल जाहीर केला आहे.  मंडळाने निकालाची माहिती सोमवारी सकाळी पत्रकार परिषदेतून जाहीर केली. प्रत्यक्षात निकाल दुपारी 1 वाजता जाहीर होणार आहे. यंदाही बारावीमध्ये मुलींनीच बाजी मारली आहे. दरम्यान आजच्या निकालामध्ये यंदाही कोकण विभागाने बाजी मारली असून, कोकण विभागाचा निकाल सर्वाधिक 96.74 टक्के इतका लागला आहे. तर यामध्ये सर्वात कमी निकाल लातूर विभागाचा 89.46  टक्के इतका लागला आहे.

सर्व विभागीय मंडळातून नियमित मुलींची उत्तीर्ण तिची टक्केवारी 94. 58% असून मुलांची उत्तीर्णतेची टक्केवारी 89.51 आहे म्हणजे मुलींची उत्तीर्णणशतेची टक्केवारी मुलांपेक्षा 5.07 टक्के ने जास्त आहेत. महाराष्ट्र राज्य शिक्षण मंडळाने दिलेल्या माहितीनुसार, विद्यार्थ्यांना दुपारी 1 वाजल्यापासून mahahsscboard.in, hscresult.mkcl.org,  maharashtra-hsc-12-results आणि results.digilocker.gov.in या प्लॅटफॉर्मवर ऑनलाइन निकाल पाहता येतील. तर, महाविद्यालयांना आवश्यक कॉलेज लॉग-इनसह mahahsscboard.in वर एकत्रित निकाल पाहता येतील.

विभागनिहाय निकालाची टक्केवारी खालीलप्रमाणे

पुणे – ९१.३२

नागपूर – ९०. ५२

छत्रपती संभाजीनगर – ९२.२४

मुंबई -९२.९३

कोल्हापूर – ९३.६४

अमरावती – ९१.४३

नाशिक – ९१.३१

लातूर – ८९.४६

कोकण – ९६.७४

निकालाचा टक्का घसरला

फेब्रुवारी-मार्च २०२४ चा निकाल ९३.३७ टक्के होता. फेब्रुवारी-मार्च २०२४ च्या तुलनेत फेब्रुवारी-मार्च २०२५ चा निकाल १.४९ टक्केने कमी आहे.