८ फेब्रुवारी २०२१,
भांडवली बाजारावरील बजेटचा प्रभाव आठवडाभरानंतर कायम असून गुंतवणूकदारांनी खरेदीचा सपाटा कायम ठेवला आहे. आज बाजार सुरु होताच सेन्सेक्सने ५०० अंकांची झेप घेतली आणि तो ५१३०० अंकांपुढे गेला. तर निफ्टी १८० अंकांनी वधारला आहे. तासाभरात गुंतवणूकदारांनी जवळपास एक लाख कोटींची कमाई केली आहे. मुंबई शेअर बाजाराच्या मंचावर ३० पैकी २७ शेअर तेजीत आहेत. ज्यात महिंद्रा अँड महिंद्रा, ऍक्सिस बँक, डॉ. रेड्डी लॅब, आयटीसी, सन फार्मा, इन्फोसिस, बजाज फायनान्स, एसबीआय, आयसीआयसीआय बँक , ओएनजीसी, नेस्ले या शेअरमध्ये वाढ झाली आहे.
सध्या सेन्सेक्स ६३५ अंकांनी वधारला असून तो ५१३६६ अंकावर ट्रेड करत आहे. निफ्टी १८० अंकांच्या तेजीसह १५१०४ अंकावर आहे. बजेटमध्ये सरकारने वित्तीय तुटीची चिंता न करता प्रचंड खर्चाची तयारी केली आहे. यामुळे विकासाला चालना मिळणार असून पुढील आर्थिक वर्षाचे ११ टक्के विकासदराचे उद्दिष्ट गुंतवणूकदारांना आश्वासक वाटत आहे. त्यामुळे बजेटनंतर बाजारात तेजीचा बोलबाला दिवसेंदिवस वाढत असल्याचे शेअर बाजार विश्लेषकांचे म्हणणे आहे. याशिवाय आज भारत पेट्रोलियम , टोरंट फार्मा, एनएमडीसी, सन टीव्ही, गोदरेज कन्झुमर या कंपन्याचे तिमाहीत निकाल जाहीर होणार आहेत.
शेअर बाजाराच्या आकडेवारीनुसार शुक्रवारी परकीय संस्थात्मक गुंतवणूकदारांनी भांडवली बाजारात १४६२ कोटींची खरेदी केली. तर स्थानिक संस्थात्मक गुंतवणूकदारांनी १४१८ कोटींची विक्री केली. कोव्हीड-१९ रोखण्यासाठी १.९ लाख कोटी डॉलर्सचे पॅकेज अखेर मंजूर झाले आहे. अमेरिकन शेअर बाजार शुक्रवारी तेजीसह बंद झाले. तर आज आशियात बहुतेक भांडवली बाजारात तेजी आहे.
