२० जानेवारी २०२१,
जागतिक बाजारातील सकारात्मक संकेत आणि देशांतर्गत पातळीवर सुरु असलेल्या करोना प्रतिबंधात्मक लसीकरण मोहिमेने भांडवली बाजारातील तेजी वृद्धिंगत केली आहे. गुंतवणूकदारांनी खरेदीचा सपाटा कायम ठेवला आहे. आज सकारात्मक सुरुवात करणारा सेन्सेक्स २५० अंकांनी वधारला आहे. तर निफ्टीत ९६ अंकांची वाढ झाली आहे.
अमेरिकेचे नवे राष्ट्राध्यक्ष म्हणून जो बायडन आज सूत्रे हाती घेणार आहेत. यानंतर आर्थिक पॅकेजला गती मिळण्याची शक्यता आहे. फेडरल रिझर्व्हच्या माजी अध्यक्ष जेनेट येलन यांची ट्रेझरी सेक्रेटरी म्हणून निवड करण्यात आली आहे. येलन यांनी यापूर्वीच करोना रोखण्यासाठी मोठ्या आर्थिक पॅकेजचे संकेत दिले आहेत. त्यामुळे बाजारात गुंतवणुकीचा ओघ वाढला असल्याचे फेडरल रिझर्व्ह आगामी पतधोरणात काय भूमिका घेते याकडे गुंतवणूकदारांची उत्सुकता लागली आहे.
आशियातील बहुतेक भांडवली बाजारातील शेअर निर्देशांक आज रेकॉर्ड स्तरावर पोहोचले. ऑस्ट्रेलिया, जपान, हाँगकाँग या देशातील शेअर निर्देशांकात वाढ झाली आहे. सध्या सेन्सेक्स ३१२ अंकांनी वधारला असून ४९७१० अंकावर आहे. निफ्टी १०१ अंकांच्या वाढीसह १४६१७ अंकावर आहे. निफ्टी मिडकॅप्स २२१३४ अंकावर असून त्यात १६३ अंकांची वाढ झाली आहे. एस अँड पी मिडकॅप्स १९११२ अंकावर असून त्यात १६० अंकांची वाढ झाली आहे.
आजच्या सत्रात आयटी, ऑटो , एफएमसीजी, बँका या शेअरमध्ये वाढ झाली आहे. ऑटो शेअरमध्ये टाटा मोटर्स, मारुती सुझुकी, हिरो मोटो कॉर्प, अशोक लेलँड, आयशर मोटर्स, महिंद्रा अँड महिंद्रा या शेअरमध्ये वाढ झाली आहे. आयटी सेवा पुरवठादारांपैकी टाटा कन्सल्टन्सी, इन्फोसिस, विप्रो, एचसीएल टेक, टेक महिंद्रा, माइंड ट्री या शेअरमध्ये वाढ झाली आहे. मंगळवारी मुंबई शेअर बाजाराचा सेन्सेक्स ८३४ अंकांच्या वाढीसह ४९३९८ अंकावर स्थिरावला होता. राष्ट्रीय शेअर बाजाराचा निफ्टी २३९ अंकांच्या वाढीसह १४५२१ अंकावर स्थिरावला. आजच्या सत्रात गुंतवणूकदारांनी किमान तीन लोक कोटींची कमाई केली.
