हिंजवडी-शिवाजीनगर मेट्रोच्या कामाला आता गती प्राप्त होत असून, मेट्रोचे दोन खांब जोडण्यासाठी आवश्यक सेगमेंट निर्मितीची प्रक्रिया ताथवडे येथील कास्टिंग यार्ड येथे सुरू झाली आहे. या २३.३ किमीच्या संपूर्ण मेट्रो प्रकल्पासाठी साडेनऊ हजार सेगमेंटची गरज लागणार आहे.
पुणे महानगर प्रदेश विकास प्राधिकरणाच्या (पीएमआरडीए) हिंजवडी मेट्रोचे सर्व काम ‘पुणे आयटी सिटी मेट्रो रेल’तर्फे (टाटा-सिमेन्स यांचा संयुक्त भागीदारी प्रकल्प) केले जात आहे. या कामासाठी हिंजवडीसह गणेशखिंड आणि बाणेर रोड येथे मेट्रोच्या खांबाच्या तयारीसाठी प्राथमिक स्वरूपाची कामे सुरू झाली आहेत. खांबांची उभारणी झाल्यानंतर दोन खांब मोठ्या सेगमेंटने जोडले जातात. या सेगमेंटच्या निर्मितीची प्रक्रिया टाटा प्रोजेक्टने नुकतीच सुरू केली आहे. खांबांचे काम पूर्ण झाल्यानंतर दोन खांब जोडण्यासाठी अशा १० ते १२ सेगमेंट्सचा वापर केला जातो. ३.२ मीटर लांबीच्या एका सेगमेंटचे वजन अंदाजे ५० टनांच्या दरम्यान असते. गेल्या शुक्रवारपासून सेगमेंट निर्मितीच्या कामाला सुरुवात झाली असून, आगामी काळात त्याचा वेग आणखी वाढविण्यात येणार असल्याची माहिती ‘पीएमआरडीए’चे आयुक्त सुहास दिवसे यांनी दिली.
‘पीएमआरडीए’ने ताथवडे येथील ‘यशदा’ची जागा कास्टिंग यार्डसाठी तात्पुरत्या स्वरूपात घेतली आहे. गेल्या दोन ते अडीच महिन्यांत सेगमेंट्सच्या निर्मिर्तीसाठी आवश्यक यंत्रसामग्रीची उभारणी करण्यात आली. त्यानंतर येथे सेगमेंट निर्मितीसाठी आवश्यक मनुष्यबळ उपलब्ध झाले असल्याने सेगमेंट निर्मितीचे काम अधिक वेगाने होऊ शकणार आहे.
२३.३ किमी हिंजवडी-शिवाजीनगर मेट्रो मार्गिकेचे अंतर ८९३ या मार्गासाठी उभारण्यात येणार एकूण खांब ९५०० संपूर्ण मार्गिकेसाठी लागणारे सेगमेंट्स वनाझ मेट्रो तपासणी अंतिम टप्प्यात
वनाझ ते गरवारे कॉलेज या दरम्यानच्या मेट्रोच्या प्राधान्य मार्गासाठी अंतिम टप्प्यातील तपासणीसाठी मेट्रो रेल्वे सुरक्षा आयुक्तांचे (सीएमआरएस) पथक सोमवारी पुण्यात दाखल झाले आहे. या पथकाने सोमवारी गरवारे कॉलेज स्टेशन आणि या परिसरातील मेट्रोच्या रूळांचे परीक्षण केले. त्याशिवाय या मार्गावरील इतरही स्टेशन आणि तांत्रिक बाबींची तपासणी करण्यात आली. गेल्या महिन्यात झालेल्या भेटीनंतर ‘सीएमआरएस’ने केलेल्या सूचनांची पूर्तता महाराष्ट्र मेट्रो रेल्वे कॉर्पोरेशनने (महामेट्रो) केली का, याचा आढावा घेण्यात येत आहे. मंगळवारी (२२ फेब्रुवारी) वनाझ ते गरवारे कॉलेज मार्गावर ही तपासणी सुरू राहणार असून बुधवारी (२३ फेब्रुवारी) पिंपरी मार्गावरील भोसरी (नाशिक फाटा) आणि कासारवाडी या स्टेशनची तपासणी केली जाणार आहे. त्यानंतर ‘सीएमआरएस’कडून वनाझ ते गरवारे कॉलेज मार्गाला अंतिम मान्यता मिळण्याची शक्यता आहे.
