युक्रेनमधील युद्ध संपवण्यासाठी बोलणी करण्यास रशिया तयार आहे, मात्र युक्रेनची लष्करी आधारभूत संरचना नष्ट करण्यासाठीचे आमचे प्रयत्न सुरूच राहतील, असे रशियाचे परराष्ट्र मंत्री सर्जेई लॅवरॉव्ह यांनी म्हटले आहे.या आठवडय़ाच्या सुरुवातीला युक्रेनतर्फे वाटाघाटीस आलेल्यांना रशियन प्रतिनिधीमंडळाने आपल्या मागण्या सादर केल्या असून, गुरुवारी होणाऱ्या बोलण्यांसाठी युक्रेनच्या प्रतिसादाची आम्ही वाट पाहात आहोत, असे लॅवरॉव्ह यांनी सांगितले.
पाश्चिमात्य देशांनी कायम युक्रेनला शस्त्रपुरवठा केला आहे, त्याच्या फौजांना प्रशिक्षण दिले आहे आणि युक्रेनचे रूपांतर रशियाविरोधी तटबंदीत करण्यासाठी तेथे तळ बांधले आहेत, असा आरोप लॅवरॉव्ह यांनी केला. यामुळे आपल्या सुरक्षितलेला धोका निर्माण झाल्यामुळेच आपल्याला युक्रेनविरुद्ध कारवाई करणे भाग पडले, असे रशियाचे म्हणणे आहे.
यावेळी झेलेन्स्की म्हणाले की, “रशियाशिवाय इतर कोणत्याही देशाने कधीही अणुऊर्जा युनिट्सवर गोळीबार केलेला नाही. हे आतापर्यंतच्या इतिहासात पहिल्यांदाच घडतंय की एखाद्या देशाने अणुऊर्जा युनिटवर गोळीबार केलाय. या दहशतवादी देशाने आता अणु दहशतवादाचा अवलंब केला आहे.” असं म्हणत रशिया चेरनोबिलची पुनरावृत्ती करू इच्छित असल्याचा आरोप झेलेन्स्की यांनी केला आहे.
दरम्यान, अणुऊर्जा प्रकल्पाला लागलेल्या आगीबाबत व्हाईट हाऊसकडूनही एक वक्तव्य आले आहे. ज्यामध्ये अमेरिकेचे अध्यक्ष जो बिडेन यांनी “रशियाने या भागातील लष्करी कारवाई थांबवावी आणि अग्निशामक तसेच इतर आपत्कालीन पथकांना प्लांटमध्ये प्रवेश करण्याची परवानगी द्यावी” असे आवाहन केले.
युक्रेनचे परराष्ट्र मंत्री दिमित्रो कुलेबा यांनीही रशियन सैन्याला हल्ला थांबवण्याचे आवाहन केले आहे. त्यांनी म्हटलं की, “जर या प्रकल्पात स्फोट झाला, तर तो चेरनोबिलपेक्षा १० पट मोठा असेल! रशियाने या प्रकल्पातील आग तत्काळ विझवावी, अग्निशामक दलांना परवानगी द्यावी आणि सुरक्षेसंदर्भातील सर्व पाहणी करावी,” असं कुलेबा यांनी ट्विटमध्ये म्हटलंय.
हा अणुऊर्जा प्रकल्प आग्नेय युक्रेनमधील औद्योगिक शहर Zaporizhzhia इथं असून ते देशाला अंदाजे ४० टक्के अणुऊर्जेचा पुरवठा करते.
