Tuesday, February 18, 2025
Homeअर्थविश्वघरखरेदीत पुणे देशात दुसऱ्या स्थानी; निर्देशांकाला फटका तरीही बाजारपेठेत तेजी

घरखरेदीत पुणे देशात दुसऱ्या स्थानी; निर्देशांकाला फटका तरीही बाजारपेठेत तेजी

भारतीय रिझर्व्ह बँकेकडून ‘रेपो’ दरात सतत वाढ केली जात असल्याने, गेल्या तीन महिन्यांत (जुलै ते सप्टेंबर) गृहकर्जांचे व्याजदर वाढले असून, परिणामी पुण्यासह देशात घर खरेदी परवडण्याचा निर्देशांक (अॅफोर्डेबिलिटी इंडेक्स) घटला आहे. मात्र, या निर्देशांकाच्या गेल्या नऊ महिन्यांच्या मूल्यांकनानुसार पुण्याने देशातील दुसऱ्या क्रमांकाच्या स्वस्त निवासी बाजारपेठेचे स्थान अबाधित ठेवले आहे, तर अहमदाबाद देशात सर्वाधिक परवडणाऱ्या गृहनिर्माण बाजारपेठेचे शहर ठरले आहे.

‘नाइट फ्रँक’ या मालमत्ता सल्लागार कंपनीच्या तिसऱ्या तिमाही (जुलै ते सप्टेंबर) अहवालात हे निरीक्षण नोंदविण्यात आले आहे. या अहवालात पुण्यासह मुंबई, दिल्ली-एनसीआर, बेंगळुरू, चेन्नई, हैदराबाद, कोलकता आणि अहमदाबाद या शहरांतील गृहनिर्माण बाजारपेठेत घर खरेदी परवडण्याच्या निर्देशांकाचा आढावा घेण्यात आला आहे. या अहवालात पुण्यात गेल्या वर्षभरात हा निर्देशांक दोन टक्क्यांनी घटल्याचे निदर्शनास येते. त्यामुळे हक्काचे घर खरेदी करू इच्छिणाऱ्या ग्राहकांच्या निर्णयावर परिणाम होण्याची शक्यता आहे. परंतु, या निर्देशांकाचा गेल्या नऊ महिन्यांचा अभ्यास केल्यास, पुणे ही देशातील दुसऱ्या क्रमांकाची स्वस्त निवासी बाजारपेठ असल्याचे अहवालात म्हटले आहे.

भारतीय रिझर्व्ह बँकेने गेल्या पाच महिन्यांत सलग चौथ्यांदा रेपो दरात वाढ केली आहे. त्यामुळे सरासरी कर्जाच्या दरात वाढ झाली असून, त्याचा फटका घर खरेदी परवडण्याच्या निर्दशांकाला बसत आहे. गृहकर्जाच्या व्याजदरात वाढ झाल्याने देशातील सर्व गृहनिर्माण बाजारपेठेत घर खरेदी परवडण्याची क्षमता घटली आहे. मध्यम गृहकर्जामध्ये ०.९५ टक्के वाढ झाल्याने घर खरेदी परवडण्याची क्षमता व निर्णयांवर परिणाम होण्याची शक्यता आहे, असेही अहवालात नमूद करण्यात आले आहे.

अॅफोर्डेबिलिटी इंडेक्स म्हणजे काय?

घर खरेदी परवडणारा निर्देशांक म्हणजे सरासरी कुटुंबाचे उत्पन्न व त्यांच्या गृहकर्जाचा मासिक हप्ता (इएमआय) यांचे गुणोत्तर होय.

रेपो दरात वाढीचा फटका

‘रिझर्व्ह बँकेने सलग चौथ्यांदा रेपो दरात वाढ केल्याने देशातील आठ शहरांमध्ये घर खरेदी परवडण्याचा निर्देशांक सरासरी दोन टक्क्यांनी घटला आहे आणि ‘इएमआय’वरील भार ७.४ टक्क्यांनी वाढला आहे,’ असेही अहवालात नमूद आहे.

पुणे : देशातील दुसऱ्या क्रमांकाची स्वस्त निवासी बाजारपेठ

वर्ष घर खरेदी परवडणारा निर्देशांक

२०१० ४५ टक्के

२०१९ २८ टक्के

२०२० २५ टक्के

२०२१ २४ टक्के

२०२२ (तिसऱ्या तिमाहीत) २६ टक्के

आठही शहरांमध्ये घर खरेदी परवडण्याचा निर्देशांक

अहमदाबाद : २२ टक्के

पुणे : २६ टक्के

चेन्नई : २७ टक्के

कोलकता : २७ टक्के

बेंगळुरू : २८ टक्के

दिल्ली-एनसीआर : ३० टक्के

हैदराबाद : ३१ टक्के

मुंबई : ५७ टक्के (सर्वांत महाग)

(स्रोत – नाइट फ्रँक इंडिया तिसरी तिमाही अहवाल)

यंदाच्या वर्षांत रेपो दरात वाढीमुळे मध्यम स्वरूपाच्या गृहकर्जाच्या व्याजदरात वाढ झाल्याने घर खरेदी परवडण्याची क्षमता दोन टक्क्यांनी कमी झाली आहे. त्यामुळे घर खरेदीच्या निर्णयावर परिणाम होणार आहे. मात्र, घरांच्या किमतीत सातत्याने वाढ होत असल्याने, हक्काच्या घराच्या शोधात असलेले नागरिक घर खरेदी पुढे ढकलण्याऐवजी कमी किमतीच्या सदनिका विकत घेण्याची तडजोड करतील. – शिशिर बैजल, अध्यक्ष व व्यवस्थापकीय संचालक, नाइट फ्रँक इंडिया

देशातील आयटी हब, वाहनोद्योगाचे मोठे केंद्र, पूर्वेचे ऑक्सफर्ड अशी ओळख असलेल्या पुण्यात नोकरी-व्यवसायाच्या निमित्ताने स्थिरावणाऱ्या नागरिकांची संख्या मोठी आहे. या नागरिकांकडून घरांची मागणी वाढते आहे. त्यामुळे पुण्यातील गृहनिर्माण बाजारपेठ वेगाने विस्तारत असल्याचे विविध सर्वेक्षणात दिसते. गृहकर्जाच्या व्याजदरात वाढ झाली असली, तरी त्याचा परिणाम घर खरेदीवर जाणवत नाही. उलट पुण्याची गृहनिर्माण बाजारपेठ २५ ते ३० टक्क्यांनी वाढल्याचे दिसते.- अनिल फरांदे, अध्यक्ष, क्रेडाई-पुणे मेट्रो

RELATED ARTICLES
- Advertisment -
Google search engine
Google search engine
Google search engine

Most Popular

Recent Comments