पुण्यात आठ वर्षीय मुलगी रस्ता चुकल्याने घाबरून रडायला लागली. मुलगी का रडतेय याची नीलकंठ माणिकशेट्टी यांनी विचारपूस केली आणि मुलीला केशवनगर पोलिसांच्या स्वाधीन केलं.
मागील काही दिवसांपासून पुण्यात महिलांवरील अत्याचारात मोठ्या प्रमाणात वाढ झाल्याचे समोर आले होते. एमपीएससी विद्यार्थीनी दर्शना पवारच्या हत्येने पुण्यात खळबळ उडाली होती. यानंतर सदाशिव पेठेत तरुणीवर एकतर्फी प्रेमातून माथेफिरूने केलेल्या कोयता हल्ल्यात तरुणी थोडक्यात बचावली होती. त्यामुळे पुण्यात महिला सुरक्षित आहेत का असा प्रश्न उपस्थित करण्यात येत होता. पोलीसांच्या कामगिरीवरही प्रश्न उपस्थित करण्यात आले होते. मात्र, हरवलेल्या चिमुकलीला अवघ्या दीड तासात तिच्या घरी सुखरुप सोडत महिलांच्या सुरक्षेबाबत संवेदनशील असल्याचे पुणे पोलिसांनी दाखवून दिले आहे.
आठ वर्षांची सिमरन घरातून एकटी बाहेर पडली. केशवनगर येथील जनसेवा बँकेजवळ गेल्यानंतर ती रस्ता चुकली. घाबरलेल्या सिमरनला रडू कोसळले. तिच्या रडण्याचा आवाज ऐकून तेथून जाणारे नीलकंठ मानिकशेट्टी यांनी तिची विचारपूस केली. मात्र, तिने काही माहिती दिली नाही. ते तिला केशवनगर पोलिस चौकीत घेऊन गेले. पोलिसांनी स्थानिक नागरिकांकडे चौकशी करून तिच्या घराचा पत्ता शोधला. पोलिसांनी दीड तासात सिमरनची आई आणि आजी यांच्याशी भेट घडवली तेव्हा सगळ्यांच्या डोळ्यात आनंदाश्रू तरळले. या क्षणाने पोलिसही भावनिक झाले.
मिळालेल्या माहितीनुसार, सिमरन ऊर्फ पुतुन मिथिलेश राय (वय ८) असे या मुलीचे नाव आहे. सिमरन आई आणि आजीसोबत केशवनगर येथे राहते. ती घरातून एकटीच बाहेर पडल्यानंतर रस्ता चुकली. मानिकशेट्टी यांनी तिला पोलिस अंमलदार दीपक कदम यांच्या ताब्यात दिले. त्यांनी तिच्याकडे आपुलकीने विचारपूस केली परंतु घाबरलेल्या सिमरनला स्वत:चे नाव आणि पत्ता सांगता येत नव्हता.
कदम यांनी ही माहिती वरिष्ठ पोलिस निरीक्षक विष्णू ताम्हाणे यांना दिली. ताम्हाणे यांनी कुटुंबीयांचा शोध घेण्याची सूचना दिली. पोलिसांनी स्थानिक नागरिकांकडे चौकशी केली असता, मुलीचे नाव सिमरन असून ती केशवनगर येथील नागपुरे चाळीत आई व आजी यांच्यासोबत राहत असल्याची माहिती मिळाली. पोलिसांनी घरी जाऊन तिला आई आणि आजीच्या ताब्यात दिले.
