कोरोना लसीकरणाच्या तिसऱ्या टप्प्याला आजपासून सुरूवात झाली. केंद्राने केलेल्या घोषणेनुसार देशभरात ४५ वर्षांपुढील सर्वांसाठी आजपासून लसीकरण सुरू होईल. आतापर्यंत कोरोनायोद्धे, सहव्याधी असलेल्या ४५ वर्षांपुढील व्यक्ती तसेच ६० वर्षांपुढील व्यक्तींचे लसीकरण केले जात होते. नागरिकांना लस देण्यास सुरुवात करण्यात झाली असून, पुण्याचे महापौर मुरलीधर मोहोळ यांनी कोथरुड येथील महापालिकेच्या सुतार दवाखाना येथे लस घेतली.
त्यानंतर माध्यमांशी बोलताना महापौर मोहोळ म्हणाले, “पुणे शहरात कोरोना विषाणूचे रुग्ण वर्षभरात मोठ्या प्रमाणावर आढळले आहेत. त्याकाळात ही साथ आटोक्यात आणण्याच्या दृष्टीनं आपण विविध उपाययोजना केल्या. वर्षभरात नागरिक लस केव्हा येणार या प्रतिक्षेत होते. अखेर आपल्या सर्वांना लस उपलब्ध झाली असून, नागरिक लस घेत आहे. मात्र नागरिकांमध्ये अनेक गैरसमज पाहण्यास मिळत आहे. नागरिकांनी न घाबरता लस घ्यावी. ही लस पूर्णपणे सुरक्षित आहे,” असं आवाहन महापौरांनी केलं.
तसेच ”शहरात ११४ केंद्र सुरू असून, दररोज साधारण १५ हजार नागरिकांना लस दिली जात आहे. त्यानुसार पहिल्या टप्प्यात तीन लाख ६० हजार नागरिकांना लस देण्यात आली आहे. तर ४५ वर्षांपुढील साधारण १५ लाख लोकसंख्या आहे. त्यामुळे या सर्वांना लस दिली जाणार आहे. शहरातील प्रत्येक नागरिकाला लस मिळण्यासाठी राज्य आणि केंद्र सरकारकडे पाठपुरावा करणार आहे. शहरात मागील काही दिवसात करोना बाधित रुग्णांची संख्या लक्षणीय वाढत आहे. त्या पार्श्वभूमीवर नागरिकांनी काळजी घ्यावी, असंही त्यांनी सांगितलं.
