पिंपरी-चिंचवड : पिंपरी-चिंचवड शहराच्या पाणीपुरवठ्याचा प्रमुख जलस्रोत असलेल्या पवना धरणाने पूर्ण क्षमतेने पाणीसाठा गाठल्यानंतर पिंपरी-चिंचवड महानगरपालिकेच्या वतीने पारंपरिक पद्धतीने जलपूजन करण्यात आले. महापौर रवि लांडगे यांच्या हस्ते जलपूजन करून जलदेवतेप्रती कृतज्ञता व्यक्त करण्यात आली. यावेळी पिंपरी-चिंचवड शहराला वर्षभर पुरेसा, नियमित आणि सुरळीत पाणीपुरवठा व्हावा, यासाठी प्रार्थना करण्यात आली.
यंदा पवना धरण पूर्ण क्षमतेने भरल्यामुळे शहराच्या पाणीपुरवठ्याच्या दृष्टीने समाधानकारक परिस्थिती निर्माण झाली आहे. या पार्श्वभूमीवर आयोजित जलपूजनाच्या माध्यमातून जलस्रोतांबद्दल कृतज्ञता व्यक्त करण्यासोबतच पाण्याचे महत्त्व आणि जलस्रोतांच्या संवर्धनाचा संदेश नागरिकांपर्यंत पोहोचविण्यात आला.
जलपूजनाच्या निमित्ताने पाण्याचा काटकसरीने वापर, जलस्रोतांचे संवर्धन, नदीपात्राची स्वच्छता आणि जलपरिसराचे संरक्षण करण्याचा संकल्प करण्यात आला. पाणी ही केवळ नैसर्गिक संपत्ती नसून शहराच्या भविष्यासाठी अत्यंत महत्त्वाची गरज आहे. त्यामुळे उपलब्ध जलसाठ्याचे जतन करणे आणि त्याचा योग्य व कार्यक्षम वापर करणे ही प्रशासनासोबतच प्रत्येक नागरिकाची सामूहिक जबाबदारी असल्याचे यावेळी अधोरेखित करण्यात आले.
कार्यक्रम पर्यावरणपूरक पद्धतीने पार पडला. धरण परिसर आणि पवना नदीपात्र स्वच्छ ठेवणे, जलप्रदूषण टाळणे तसेच जलस्रोतांच्या स्वच्छतेबाबत नागरिकांमध्ये जनजागृती करण्याचा संदेश देण्यात आला. पवना नदी व धरण परिसराच्या स्वच्छता आणि संवर्धनासाठी नागरिकांनीही सक्रिय सहभाग नोंदवावा, असे आवाहन करण्यात आले.
पिंपरी-चिंचवड शहराची वाढती लोकसंख्या आणि भविष्यातील पाण्याची गरज लक्षात घेता जलस्रोतांचे नियोजनबद्ध संवर्धन, पाणी बचत आणि उपलब्ध पाण्याचा कार्यक्षम वापर यावर भर देणे आवश्यक आहे. महापालिका प्रशासनाच्या माध्यमातून यासाठी विविध उपाययोजना राबविण्यात येत असून नागरिकांनीही दैनंदिन जीवनात पाणी बचतीच्या सवयी अंगीकाराव्यात, असे आवाहन करण्यात आले.
यावेळी उपमहापौर शर्मिला बाबर, विरोधी पक्षनेते भाऊसाहेब भोईर, महापालिकेच्या पाणीपुरवठा विभागाचे सह शहर अभियंता अजय सूर्यवंशी, कार्यकारी अभियंता महेश बरीदे, जलसंपदा विभागाचे रजनीश भारिया यांच्यासह शहर व परिसरातील पत्रकार बंधू-भगिनी, महापालिका अधिकारी आणि कर्मचारी उपस्थित होते.
‘पाणी वाचवा, जलस्रोत जपा आणि भावी पिढ्यांसाठी जलसुरक्षित शहर घडवा’ हा संदेश देत जलपूजन कार्यक्रमाचा समारोप करण्यात आला.
