अल्पबचत योजनांवरील व्याजदराच्या निर्णयावर मोदी सरकारला टीकेचा सामना करावा लागत आहे. केंद्र सरकारच्या यू-टर्न भूमिकेवर आणि झालेल्या चुकीवर विरोधकांनी निशाणा साधला आहे. राष्ट्रवादी काँग्रेसच्या नेत्या खासदार सुप्रिया सुळे यांनीही मोदी सरकारला यू-टर्न भूमिकेवरून टोमणा मारत अभिनंदनही केलं आहे.
सार्वजनिक भविष्यनिर्वाह निधीवरील अर्थात पीपीएफसह अल्पबचत योजनांवरील व्याजदरात कपात करण्याचा आदेश अर्थ मंत्रालयाने बुधवारी काढला होता. हा निर्णय काही तासांतच सरकारने मागे घेतला. सरकारच्या निर्णय मागे घेण्याच्या भूमिकेचं खासदार सुप्रिया सुळे यांनी स्वागत केलं असून, असाच निर्णय पेट्रोल-डिझेल आणि गॅस दरवाढीबाबत घेण्याची विनंती केली आहे.
“अल्पबचतीवरील व्याजदरांमध्ये कपात करण्याचा निर्णय सरकारनं तातडीनं फिरविला. सरकारचं याबद्दल अभिनंदन. यामुळे सर्वसामान्य जनतेला दिलासा मिळाला. आता केंद्र सरकारनं अशीच तत्परता पेट्रोल, डिझेल व स्वयंपाकाचा गॅस यांवर लादलेली मोठी दरवाढ देखील तात्काळ मागे घ्यावी ही विनंती,” असं सुप्रिया सुळे यांनी म्हटलं आहे.
केंद्रीय अर्थ मंत्रालयाने अल्पबचत योजनांवरील व्याजदरात कपात करण्याचा आदेश बुधवारी रात्री काढला. त्यावरून टीका होण्यास सुरू झाल्यानंतर केंद्रीय अर्थमंत्री निर्मला सीतारामन यांनी सकाळीच खुलासा करत सावरासारव केली. हा आदेश चुकीनं काढला गेला असल्याचं त्यांनी स्पष्ट केलं.
