पिंपरी-चिंचवड | प्रतिनिधी : पिंपरी-चिंचवड महानगरपालिकेच्या जुन्या आणि पारंपरिक लोगोला आता आकर्षक एम्बॉस्ड (Embossed) व त्रिमितीय स्वरूपदेण्यात आलेले पाहायला मिळत आहे. या लोगोमध्ये शहराची ऐतिहासिक, सांस्कृतिक आणि औद्योगिक ओळख अधोरेखित करणाऱ्या विविध प्रतिकांचा समावेश आहे.
लोगोच्या मध्यभागी छत्रपती शिवाजी महाराजांचे अश्वारूढ शिल्प असून, त्यामागे शहराच्या ऐतिहासिक आणि सांस्कृतिक वारशाचे प्रतीकात्मक दर्शन घडविण्यात आले आहे. एका बाजूला मंदिराचे शिल्प, तर दुसऱ्या बाजूला उद्योग-व्यवसायाचे प्रतिनिधित्व करणारे कारखान्याचे प्रतीक दिसते. खालील भागात जलप्रवाहाचे प्रतीकही आहे.
या संपूर्ण रचनेभोवती गिअरचे (दातेरी चक्र) स्वरूप देण्यात आले असून, ते पिंपरी-चिंचवडच्या औद्योगिक शहराच्या ओळखीशी जोडलेले असल्याचे जाणवते. वरच्या भागात “पिंपरी चिंचवड महानगरपालिका”, तर खालच्या भागातील पट्टीवर “कटिबद्ध जनहिताय” हे महापालिकेचे ब्रीदवाक्य स्पष्टपणे दिसते.
विशेष म्हणजे, हा लोगो पूर्णपणे नवीन संकल्पना नसून महापालिकेच्या जुन्या लोगोच्या मूळ आशयाला कायम ठेवत त्याला अधिक उठावदार, कलात्मक आणि त्रिमितीय एम्बॉस्ड स्वरूप देण्यात आलेले दिसते. त्यामुळे जुन्या लोगोची ओळख कायम ठेवून त्याला आधुनिक दृश्यरूप देण्याचा प्रयत्न असल्याचे या रचनेतून दिसून येते.
पिंपरी-चिंचवड महापालिकेच्या अधिकृत संकेतस्थळावरही “कटिबद्ध जनहिताय” हे ब्रीदवाक्य वापरले जाते. महापालिकेच्या इतिहासविषयक माहितीनुसार पिंपरी-चिंचवडची ओळख औद्योगिक शहराबरोबरच क्रांतिकारक चापेकर आणि महासाधू मोरया गोसावी यांच्या ऐतिहासिक वारशाशी जोडलेली आहे.
त्यामुळे शिवरायांचा इतिहास, धार्मिक-सांस्कृतिक वारसा, औद्योगिक विकास आणि जनहिताची बांधिलकी या सर्वांचा प्रतीकात्मक मिलाफ या लोगोमध्ये दिसून येतो. जुन्या लोगोला एम्बॉस्ड स्वरूप मिळाल्याने महापालिकेच्या अधिकृत ओळखीला एक वेगळे आणि भव्य दृश्यरूप प्राप्त झाले आहे.
लवकरच या लोगोचा अंतिम नमुना तयार करण्यात येणार असून, त्यानंतर पिंपरी-चिंचवड महापालिकेच्या सर्व कार्यालयांमध्ये आणि संबंधित ठिकाणी हा लोगो वापरात आणला जाणार आहे. त्यासाठी योग्य आकारमान, स्वरूप आणि एकसमान मांडणी निश्चित करून सर्व कार्यालयांमध्ये लोगो लावण्याची अंतिम मागणी उपसूचनेद्वारे करण्यात येणार आहे.
