लोहगाव विमानतळावरील हवाई दलाच्या ताब्यातील अडीच एकर जागा विमानतळ प्राधिकरणाला नाममात्र एक रुपया दराने वापरण्यास संरक्षण मंत्रालयाने मान्यता दिली आहे. त्यामुळे विमानतळाच्या विस्तारीकरणाचा आणि कार्गो सेवेसाठी पायाभूत सुविधा निर्माण करण्यास चालना मिळणार आहे. डिसेंबर २०२०मध्ये खासदार गिरीश बापट यांच्या उपस्थितीत नवी दिल्ली येथे बैठक घेण्यात आली. या बैठकीत लोहगाव विमानतळाच्या विस्तारीकरणाच्या प्रश्नावर चर्चा झाली होती. तेव्हा लोहगाव विमानतळावरील अडीच एकर जागा विमानतळ प्राधिकरणास देण्यास हवाई दलाने तत्वत: मान्यता दिली होती.
संरक्षण मंत्रालयाने या जागेसाठी एक कोटी ३८ लाख ३० हजार रुपये वार्षिक भाडे आकारण्याचे निश्चित केले होते. मात्र, भाडे कमी करून नाममात्र आकारण्याची मागणी खासदार बापट यांनी केंद्रीय नागरी हवाई वाहतूक मंत्री ज्योतिरादित्य शिंदे यांच्याकडे केली होती. त्यास अनुसरून संरक्षण मंत्रालयाने यापूर्वी निश्चित केलेल्या भाड्याऐवजी एक रुपये दराने भाडे आकारण्याचा निर्णय घेतला. यामुळे पुणे विमानतळावर कार्गोसाठी अडीच एकर जागा उपलब्ध होणार असून, गेल्या अनेक दिवसांपासून प्रलंबित प्रश्न मार्गी लागला आहे, अशी प्रतिक्रिया बापट यांनी व्यक्त केली.
