जय देवगण आणि तब्बू स्टारर ‘दृश्यम ‘ , ‘दृश्यम २’ चित्रपटानं बॉक्स ऑफिसवर धुमाकूळ घातला . सस्पेन्स ड्रामा चित्रपटाला लोकांचे भरभरून प्रेम मिळत आहे. आता या चित्रपटाच्या तिसऱ्या भागाची चर्चा सुरू आहे. लवकरच ‘दृश्यम ३’ची अधिकृत घोषणा होणार असल्याचं म्हटलं जात आहे.
दाक्षिणात्य सुपरस्टार मोहनलाल आणि जीतू जोसेफ यांनी २०१३ मध्ये ‘दृश्यम’ हा भन्नाट क्राइम थ्रीलर आणला. त्यानंतर त्याचा अजय देवगणनं हिंदीत, कमल हसन यांनी तमीळमध्ये, तर व्यंकटेशनं तेलगू भाषेत रिमेक केला. आता ‘दृश्यम’च्या निर्मात्यांनी हिंदीवाल्यांसोबत डील केली असून लवकरच ‘दृश्यम ३’ची अधिकृत घोषणा होणार आहे.
विशेष म्हणजे, या गाजलेल्या चित्रपट सीरीजमधला तिसरा भाग म्हणजे हिंदी आणि मल्याळम् आवृत्तीचं चित्रीकरण एकाच वेळी होणार असल्याची चर्चा आहे. ‘दृश्यम २’चं दिग्दर्शन करणाऱ्या दिग्दर्शक अभिषेक पाठकनं तिसऱ्या भागाची कल्पना कागदावर मांडली असून निर्मात्यांनी त्यासाठी हिरवा कंदिल दाखवला आहे.
हिंदी आणि मल्याळम् चित्रपट एकाच वेळी चित्रित करून त्यांचं प्रदर्शनही एकाच तारखेला करण्याचा निर्मात्यांचा मानस आहे. त्यामुळे मोहनलाल यांनी साकारलेला जॉर्ज कुट्टी आणि अजयनं साकारलेला विजय साळगावकर एकाच दिवशी तिसरा भाग घेऊन चाहत्यांसमोर येतील. पहिले दोन्ही भाग यशस्वी ठरल्यानं आता तिसऱ्या भागात काय असेल, याची उत्सुकता कायम असणार आहे.
बॉक्स ऑफिस आणि ओटीटी
अजय देवगण आणि तब्बू यांच्या प्रमुख भूमिका असलेला दृश्यम २ बॉक्स ऑफिसवर तुफान यशस्वी ठरला . या चित्रपटानं जगभरात ३०० कोटींहून अधिक घसघशीत कमाई केली. बॉक्स ऑफिसवर कोट्यवधींचा गल्ला जमवल्यानंतर दृश्यम २ नंओटीटीवर धुमाकूळ घातल्याचं पाहायला मिळालं.दृश्यम २ हा चित्रपट अॅमेझॉन प्राइम व्हिडिओवर प्रदर्शित झाला आहे. सुरुवातीला या हा चित्रपट ओटीटीवर रेंट सर्व्हिसवर उपलब्ध होता. पण नंतर ओटीटी प्लॅटफॉर्म अॅमेझॉन प्राइम व्हिडिओवर दृश्यम २चं फ्री ऑनलाइन स्ट्रीमिंग करण्यात आलं.तर तुमच्याकडं अॅमेझॉन प्राइमचं सब्सक्रिप्शन असेल तर हा चित्रपट तुम्हाला फ्रीमध्ये पाहाता येतो.
दरम्यान, दृश्यम २ सिनेमाचं दिग्दर्शन अभिषेक पाठकनं केलं होतं. एका मुलाखतीत अभिषेकनं सांगितलं होतं की, हा मल्याळम सिनेमाचा रिमेक नाही. फ्रेम टू फ्रेम रिमेक बनवण्यात काहीच अर्थ नसतो. जर असं केल तर दिग्दर्शक म्हणून तुमच्याकडं करण्यासारखं काहीच नसतं. सिनेमाचं दिग्दर्शन करताना त्यात तुमचा दृष्टिकोन असायलाच लागतो. याचा फायदा सिनेमाला होत असतो.
