शिवसेना प्रणित महाराष्ट्र मजदूर संघटनेच्या वतीने पिंपरी-चिंचवड शहर व पुणे जिल्हा अध्यक्षपदी हनुमंत सुभाष तरडे यांची निवड करण्यात आली आहे. संघटनेचे संस्थापक अध्यक्ष इरफान सय्यद यांच्या मार्गदर्शनाखाली ही नियुक्ती जाहीर करण्यात आली असून, या निवडीमुळे कामगार क्षेत्रात नवचैतन्य निर्माण होणार असल्याची प्रतिक्रिया व्यक्त होत आहे.
छत्रपती शिवाजी महाराज यांच्या प्रेरणेतून आणि हिंदुहृदयसम्राट बाळासाहेब ठाकरे यांच्या विचारधारेवर चालणाऱ्या या संघटनेने नेहमीच कामगारांच्या हक्कांसाठी संघर्ष केला आहे. त्याच परंपरेला पुढे नेत हनुमंत तरडे यांच्याकडे ही महत्त्वाची जबाबदारी सोपवण्यात आली आहे.
संघटनेच्या पत्रानुसार, कामगारांच्या हितासाठी प्रामाणिकपणे व कष्टपूर्वक कार्य करणे, समाजात कोणताही त्रास होऊ न देणे, तसेच संघटनेची धोरणे व उद्दिष्टे यांचा प्रसार करणे, या प्रमुख अपेक्षा व्यक्त करण्यात आल्या आहेत. कामगारांमध्ये एकजूट निर्माण करून त्यांच्या समस्या सोडवण्यासाठी तत्पर राहण्याचे आवाहन करण्यात आले आहे.
आजच्या बदलत्या औद्योगिक परिस्थितीत सक्षम नेतृत्वाची गरज अधोरेखित करत हनुमंत तरडे यांनी सामाजिक बांधिलकी जपत कामगारांच्या न्याय हक्कांसाठी लढा देण्याचा निर्धार व्यक्त केला आहे.
ही नियुक्ती एक वर्षासाठी करण्यात आली असून, त्यांच्या कामगिरीचा आढावा घेऊन पुढील निर्णय घेतला जाणार आहे. या कालावधीत कामगारांच्या प्रश्नांवर ठोस भूमिका घेऊन संघटनेला अधिक बळकटी देण्याचे आव्हान त्यांच्यासमोर असणार आहे.
कामगार वर्गाच्या अपेक्षा पूर्ण करत संघटनेला नवी उंचीवर नेण्याची जबाबदारी आता हनुमंत तरडे यांच्या खांद्यावर आली असून, त्यांच्या नेतृत्वाकडे सर्वांचे लक्ष लागले आहे.
