२६ ऑगस्ट २०२१,
केंद्र सरकारने DNA वर आधारीत जगातील पहिल्या Zycov-D या जायडस कॅडिलाच्या करोनावरील लसीला काही दिवसांपूर्वी मंजुरी दिली. ही लस १२ वर्षांवरील मुलांसाठी विकसित करण्यात आली आहे. पण ही लस कधीपासून मुलांना दिली जाणार हे, स्पष्ट करण्यात आलं नव्हतं. आता NTAGI चे प्रमुख एन. के. अरोरा यांनी याबाबत स्पष्टता आणली आहे. येत्या ऑक्टोबरपासून लहान मुलांना करोनावरील Zycov-D ही लस दिली जाईल, असं अरोरा यांनी सांगिलं. तीन डोस असलेली ही लस आहे.
येत्या ऑक्टोबरपासून लहान मुलांना करोनावरील लस दिली जाईल. गंभीर आजार असलेल्या मुलांची यादी तयार केली जाईल. सर्वप्रथम प्राधान्याने या मुलांना ही लस दिली जाईल, असं अरोरा यांनी सांगितलं. राज्य सरकारांनी मुलांच्या बौद्धीक विकासासाठी प्राथमिक शाळा सुरू कराव्यात, अशी सूचना करण्यात आली आहे. १२ ते १८ वर्षांदरम्यानच्या गंभीर आजार असलेल्या मुलांची यादी राज्यांनी तयार करावी. यामुळे या मुलांना सर्वात आधी लस मिळू शकेल. Zycov D लस देण्याच्या आधी ही यादी जाहीर केली जाईल. या यादीच्या आधारावर १२ ते १७ ऑक्टोबरदरम्यान गंभीर आजार असलेल्या मुलांना लस देण्यास सुरुवात केली जाईल, असं अरोरा यांनी सांगितलं.
देशात १२ ते १७ वर्षांदरम्यानच्या मुलांची एकूण संख्या ही १२ कोटी आहे. तंदुरुस्त मुलांमध्ये करोनाने गंभीर आजार किंवा मृत्युची शक्यता खूप कमी असते किंवा नसतेच. सरकारला चिंता फक्त गंभीर आजार असलेल्या मुलांची आहे. यामुळे गंभीर आजार असलेल्या लहान मुलांना करोनाची लस सर्वात आधी दिली जाणार आहे.
देशात १८ वर्षांहून कमी वयाच्या मुलांची संख्या ही ४४ कोटी इतकी आहे. गेल्या दीड वर्षातील अनुभव पाहता मुलांमध्ये करोनाचा संसर्ग गंभीर नसतो. पण संसर्गाचा प्रादुर्भाव होण्यास लहान मुलांची भूमिका असते. पण त्यांना करोनाचा संसर्गाचा त्यांच्यावर फारसा परिणाम होत नाही. लहान मुलांच्या शाळा उघडता येऊ शकतात. त्यांना तातडीने लसीकरण गरजेचं नाही. पण शाळेतील कर्मचाऱ्यांचं प्राधान्याने लसीकरण करण्याची आवश्यकता आहे. यामुळे राज्य सरकारांनी मुलांच्या बौद्धीक विकासासाठी लवकरात लवकर शाळा सुरू कराव्यात, असं अवाहन त्यांनी केलं.
