सर्व शासकीय, पालिका तसेच खासगी लसीकरण केंद्रांवर आज सोमवार, १० जानेवारीपासून आरोग्य कर्मचारी, आघाडीवरील (फ्रंटलाइन) कर्मचारी आणि ६० वर्षांवरील सहव्याधी असलेल्या ज्येष्ठ नागरिकांना करोना लशीचा संरक्षक डोस (प्रोटेक्शन डोस) मिळणार आहे. या मात्रेसाठी दुसरी मात्रा घेतल्याच्या तारखेपासून नऊ महिने किंवा ३९ आठवडे पूर्ण झालेले असणे आवश्यक आहे.
पुणे महापालिकेने व्यवस्था केली असून, या नागरिकांना त्यांनी पूर्वी घेतलेल्या लशीचाच तिसरा डोस दिला जाणार आहे.
केंद्र सरकारच्या मार्गदर्शक सूचनांनुसार आणि कोव्हिड-१९ वर्किंग ग्रुप ऑफ नॅशनल टेक्निकल ॲडव्हायझरी ग्रुप ऑन इम्युनायझेशन तसेच स्टँडिंग टेक्निकल सायन्टिफिक कमिटी यांच्या निर्देशानुसार हे लसीकरण सुरू होणार आहे.
शासकीय आणि पालिका लसीकरण केंद्रांवर सर्व पात्र नागरिकांना विनामूल्य संरक्षक डोस देण्यात येईल. ज्या पात्र नागरिकांना खासगी लसीकरण केंद्रावर लस घ्यायची असेल, अशा नागरिकांसाठी केंद्र सरकारने पूर्वी घोषित केलेल्या किमतीमध्येच लसीकरण केले जाईल. लशीच्या किमतीमध्ये कोणताही बदल करण्यात आलेला नाही, असे मुंबई महापालिकेने स्पष्ट केले आहे.
सर्व आरोग्य कर्मचारी, आघाडीवर काम करणारे कर्मचारी ज्यांचे वय ६० वर्षांपेक्षा कमी आहे व ज्यांची कोविन अॅपवर यापूर्वी लस घेताना कर्मचारी ऐवजी ‘नागरिक’ अशी वर्गवारी नोंद झाली आहे, अशा लाभार्थ्यांचे लसीकरण शासकीय व पालिका लसीकरण केंद्रात थेट येऊन (ऑनसाइट/वॉक इन) नोंदणी पद्धतीने उपलब्ध असेल. त्यासाठी त्यांनी नोकरीच्या ठिकाणचे प्रमाणपत्र/ओळखपत्र सादर करणे बंधनकारक असेल
प्रमाणपत्र जमा करण्याची गरज नाही
साठ वर्षे व त्यावरील वयाच्या सहव्याधी असलेल्या नागरिकांना प्रतिबंधात्मक मात्रा घेण्यासाठी लसीकरण केंद्राच्या ठिकाणी कोणतेही प्रमाणपत्र जमा करण्याचे किवा दाखवण्याची आवश्यकता नाही. मात्र, अशा व्यक्तींनी त्यांच्या डॉक्टरांच्या सल्ल्याने लस घेण्याबाबत निर्णय घेणे आवश्यक आहे.लाभार्थ्यांनी आधी कोव्हिशील्ड लस घेतली असेल तर त्यांना कोव्हिशील्ड, ज्यांनी आधी कोव्हॅक्सिन लस घेतली असेल त्यांना कोव्हॅक्सिन लशीचा डोस देण्यात येईल.
