पिंपरी : संगीत नाटक अकादमी, भारत सरकार व डॉ. डी. वाय. पाटील स्कूल ऑफ लिबरल आर्ट्स यांच्या संयुक्त विद्यमाने ‘प्रातिज्ञ’ उपक्रमांतर्गत भरतनाट्यम आणि सुरबहार वादनाचा एक भव्य सांस्कृतिक कार्यक्रम २५ एप्रिल २०२५ रोजी डी. वाय. पाटील मेडिकल कॉलेज ऑडिटोरियम येथे पार पडला.
कार्यक्रमाची सुरुवात दीपप्रज्वलनाने झाली. यावेळी प्रमुख उपस्थिती होती प्र-कुलपती डॉ. भाग्यश्री पाटील, पद्मश्री व एस.एन.ए. फेलो कल्याण सुंदरम पिल्लई (वय ९३), एस.एन.ए. पुरस्कारप्राप्त सुरबहार वादक पुष्पराज कोष्टी, वैद्यकीय महाविद्यालयाच्या अधिष्ठाता डॉ. ए. रेखा, आणि IQAC संचालक डॉ. वत्सला स्वामी यांची.प्रारंभी स्कूल ऑफ लिबरल आर्ट्सचे संचालक व ज्येष्ठ कथक नर्तक डॉ. नंदकिशोर कपोते यांनी प्र-कुलपती डॉ. भाग्यश्री पाटील यांचे स्वागत केले. त्यानंतर डॉ. पाटील यांच्या हस्ते पद्मश्री कल्याण सुंदरम पिल्लई यांचा शाल, श्रीफळ व सन्मानचिन्ह देऊन गौरव करण्यात आला.
कार्यक्रमात कल्याण सुंदरम यांच्या जीवनावर आधारित माहितीपट दाखविण्यात आला. त्यानंतर त्यांच्या भरतनाट्यम नृत्यावरील सप्रयोग व्याख्यानाने रसिकांना भारावून टाकले. वयाच्या ९३व्या वर्षीही त्यांनी नृत्यमुद्रा सादर करून उपस्थितांना अचंबित केले. त्यांच्या पुत्र हरिकृष्ण पिल्लई यांनीही भरतनाट्यम सादर केले.डॉ. भाग्यश्री पाटील यांनी गायलेले गुरुवंदना व राजराजेश्वरी अष्टकम, यावर स्वाती दैठणकर यांनी सुंदर नृत्य सादर केले. त्यानंतर पुष्पराज कोष्टी यांच्या सुरबहार वादनाने वातावरण भारून गेले.
कार्यक्रमास स्वाती दैठणकर, निकिता मोघे, विणा अरकेरी आदी मान्यवर कलावंत उपस्थित होते. संपूर्ण कार्यक्रमाचे सूत्रसंचालन प्रतिमा चव्हाण यांनी केले.
