आरोग्य विभागातील भरतीची प्रश्नपत्रिका परीक्षेपूर्वीच लातूरच्या आरोग्य विभागातील मुख्य प्रशासकीय अधिकाऱ्याला पाठविणाऱ्या आरोग्य विभागातील सहसंचालक महेश सत्यवान बोटले (वय ५३, रा. मुंबई) याला न्यायालयाने १३ डिसेंबरपर्यंत पोलीस कोठडी सुनावली आहे. प्रथमवर्ग न्यायदंडाधिकारी एस. जी. डोलारे यांनी हा आदेश दिला.
बोटले याला सायबर पोलिसांनी बुधवारी रात्री अटक केली होती. सायबर पोलिसांनी लातूरच्या सार्वजनिक आरोग्य विभागातील मुख्य प्रशासकीय अधिकारी प्रशांत व्यंकटराव बडगिरे (वय ५०) यांच्यासह पाचजणांना ७ डिसेंबरला अटक केली होती. त्यांच्या चौकशीत मुंबईतील आरोग्य संचालनालयातील एका वरिष्ठ अधिकाऱ्याने प्रश्नपत्रिका दिल्याचे बडगिरे याने पोलिसांना सांगितले होते. त्यानुसार बोटले यानेच प्रश्नपत्रिका बडगिरे याला दिल्याचे समोर आले आहे.
या प्रकरणात सायबर पोलिसांनी आतापर्यंत एकूण १२ जणांना अटक केली आहे. दलाल, क्लासचालक, शासकीय अधिकारी, कर्मचारी यांच्यापासून थेट प्रत्यक्ष प्रश्नपत्रिका फोडणाऱ्यांपर्यंत पोहोचण्यात पुणे पोलिसांना यश आले आहे. बोटले याला गुरुवारी न्यायालयात हजर करण्यात आले होते. बोटले याने बडगिरे याच्याशिवाय आणखी कोणाला प्रश्नपत्रिका पाठवली होती का, अटक आरोपींना आणखी कोणी मदत केली, आदींचा तपास करण्यासाठी बोटले याला सात दिवसांची पोलीस कोठडी देण्याची मागणी सरकारी वकील विजर्यंसह जाधव यांनी केली होती. ती न्यायालयाने मान्य केली.
