मुंबई : बॉलीवूड अभिनेत्री आणि भारतीय जनता पक्षाच्या खासदार किरण खेर यांना ब्लड कॅन्सर झाल्याची माहिती समोर आली आहे. सध्या त्यांच्यावर मुंबईतील रुग्णालयात उपचार सुरू आहे. किरण खेर यांचे पती अभिनेता अनुपम खेर यांनी ट्विट करत या बातमीला दुजोरा दिला आहे. किरण खेर या चंदीगढ लोकसभा मतदारसंघाच्या खासदार आहेत.
गेल्या वर्षी नोव्हेंबर माहिन्यात किरण खेर चंदीगढमध्ये असताना त्यांना या आजाराबाबत कळालं. त्यानंतर त्यांनी पोस्ट ग्रॅज्युएट इन्स्टिट्यूच ऑफ मेडिकल अॅन्ड एज्युकेशन अँड रिसर्चमध्ये (PGIMER) मेडिकल टेस्ट केल्यानंतर त्यांना मल्टीपल मायलोमा याचे निदान झाले. त्यानंतर त्यांना 4 डिसेंबर रोजी उपचारासाठी मुंबईला आणण्यात आलं.
बुधवारी चंदीगढ भाजप प्रदेशाध्यक्ष अरुण सूद यांनी पत्रकार परिषदेचे आयोजित केली होती. त्यावेळी अरुण यांनी किरण खेर यांना ब्लड कॅन्सर झाल्याची माहिती दिली. सूद म्हणाले, चार महिने उपचार घेतल्यानंतर आता त्यांची प्रकृती स्थिर आहे. त्यांना रुग्णालयातून डिस्चार्ज देण्यात आला आहे. सध्या त्यांना कोकिलाबेन रुग्णालयात दाखल करण्यात आलेलं नाही पण त्यांना उपचारासाठी नियमितपणे रुग्णालयात जावं लागत आहे.
