७ मार्च २०२१,
राष्ट्रीयीकृत बँकांच्या खासगीकरणाविरोधात युनायटेड फोरम ऑफ बँक युनियन्सने १५ व १६ मार्च रोजी देशव्यापी संपाची हाक दिली आहे. शनिवार, रविवारच्या सुटीनंतर सोमवार, मंगळवार हा संप असल्याने सलग चार दिवस बँकांचे कामकाज बंद राहणार आहे.
‘यूएफबीयू’चे राज्य निमंत्रक देविदास तुळजापूरकर यांनी पत्रकार परिषदेत ही माहिती दिली. महेश पारखी, विजय शेंडकर, विलास वारोसे आदी उपस्थित होते.
‘यूएफबीयू’ ही बँक कर्मचारी संघटनांची शिखर संस्था आहे. यात नऊ बँक कामगार संघटनांचा समावेश आहे. सर्व संघटनांचा सहभाग असल्याने बँकांचे कामकाज ठप्प होणार आहे. ‘सार्वजनिक क्षेत्रातील बँकांचे खासगीकरण करण्यात आले, तर खेड्यातले बँकिंग आकुंचित होईल. शेतीला कर्जपुरवठा मिळणार नाही; कारण खासगी बँका जिथे नफा आहे, तेथेच बँकिंग करतात,’ असे तुळजापूरकर म्हणाले.
‘सार्वजनिक बँकांचे खासगीकरण झाल्यास या बँका उर्वरित भागातून काढता पाय घेतील. मग त्या भागात बँकिंग सेवा कशी पुरवणार? काही अपवाद सोडले, तर आज जिल्हा सहकारी बँका कोलमडल्या आहेत. प्रादेशिक ग्रामीण बँकांच्या जवळची साधनसामुग्री मर्यादित आहे. खासगीकरण झाल्यास ग्रामीण जनता पुन्हा सावकार किंवा आधुनिक सावकारांच्या दरवाजात उभी राहील. यामुळे याबाबत जनतेने लोकप्रतिनिधींना जाब विचारायला हवा,’ असे तुळजापूरकर म्हणाले.
महाबँकेत संपाचा इशारा
‘महाराष्ट्र बँकेच्या व्यवस्थापनाने पुरेशी नोकरभरती करावी, या प्रमुख मागणीसाठी ऑल इंडिया बँक एम्प्लॉइज असोसिएशनने (एआयबीईए) १२ मार्च रोजी लाक्षणिक संपाचा इशारा दिला आहे. या संपात सहा हजारांहून अधिक कर्मचारी सहभागी होतील. या प्रकरणी १० मार्च रोजी समेट बैठकीत तोडगा न निघाल्यास १२ मार्च रोजी देशव्यापी संप करण्यात येईल,’ असे देविदास तुळजापूरकर यांनी सांगितले.
