अग्निशामक दल, पोलीस, एनडीआरएफकडून युद्धपातळीवर बचावकार्य; जखमी कर्मचाऱ्यावर उपचार सुरू
पिंपरी-चिंचवड | प्रतिनिधी
पिंपरी-चिंचवड शहरातील मोशी येथील महापालिकेच्या वेस्ट-टू-एनर्जी प्रकल्पात बुधवारी दुपारी भीषण दुर्घटना घडली. प्रकल्पाच्या मागील बाजूस साठवून ठेवलेला कचऱ्याचा प्रचंड ढिगारा अचानक इमारतीवर कोसळल्याने तीन मजली प्रशासकीय इमारतीचा मोठा भाग जमीनदोस्त झाला. या दुर्घटनेत किमान १४ कर्मचारी ढिगाऱ्याखाली अडकल्याची भीती व्यक्त करण्यात येत असून, एका गंभीर जखमी कर्मचाऱ्याला तातडीने रुग्णालयात दाखल करण्यात आले आहे.
प्राथमिक माहितीनुसार, ही घटना दुपारी सुमारे १.४५ वाजण्याच्या सुमारास घडली. मोशी कचरा डेपोजवळील वेस्ट-टू-एनर्जी प्रकल्पामध्ये कचऱ्यापासून वीज निर्मितीचे काम केले जाते. प्रकल्पाच्या तीन मजली इमारतीत प्रशासकीय कार्यालये होती. इमारतीच्या मागील बाजूस असलेला कचऱ्याचा मोठा ढिगारा अचानक घसरून इमारतीवर कोसळल्याने संपूर्ण संरचना हादरली आणि इमारतीचा मोठा भाग कोसळला.
दुर्घटनेनंतर परिसरात एकच खळबळ उडाली. स्थानिक नागरिकांनी तातडीने मदतकार्य सुरू करत अडकलेल्या कर्मचाऱ्यांना बाहेर काढण्याचा प्रयत्न केला. घटनेची माहिती मिळताच पोलीस, अग्निशामक दल, महापालिका प्रशासन आणि आपत्ती व्यवस्थापन पथके घटनास्थळी दाखल झाली.
अधिकाऱ्यांनी दिलेल्या माहितीनुसार, दुसऱ्या मजल्यावर अडकलेल्या काही कर्मचाऱ्यांची सुरक्षित सुटका करण्यात आली आहे, मात्र पहिल्या मजल्यावर सुमारे १४ कर्मचारी अडकल्याची शक्यता व्यक्त करण्यात येत आहे. त्यामुळे बचावकार्य अधिक वेगाने सुरू असून प्रत्येक मिनिट महत्त्वाचे ठरत आहे.
घटनेचे गांभीर्य लक्षात घेऊन राष्ट्रीय आपत्ती प्रतिसाद दल (NDRF) चे पथकही घटनास्थळी दाखल झाले आहे. जेसीबी आणि इतर अवजड यंत्रसामग्रीच्या सहाय्याने इमारतीवर कोसळलेला कचऱ्याचा ढिगारा हटवण्याचे काम सुरू असून, ढिगाऱ्याखाली अडकलेल्या कर्मचाऱ्यांचा शोध घेण्यासाठी युद्धपातळीवर मोहीम राबवली जात आहे.
या दुर्घटनेचे नेमके कारण आणि किती जण अडकले आहेत, याबाबत अधिकृत माहिती बचावकार्य पूर्ण झाल्यानंतरच स्पष्ट होणार आहे.
