५ ऑगस्ट २०२१,
रुचिका सेठ (वय ३०, रा. नवी दिल्ली) असे मृत्यू झालेल्या तरुणीचे नाव आहे. जुन्नरचे पोलिस निरीक्षक विकास जाधव यांनी दिलेल्या माहितीनुसार, रुचिका ३१ जुलैला दिल्लीहून ठाणे येथे आली होती. तेथून मित्र ओमकार बाईत यांच्या समवेत दुचाकीवरून
जीवधन किल्ला पाहण्यासाठी आली होती. त्यांच्या समवेत आणखी दोघे होते. सर्वांनी मंगळवारी नाणेघाटात मुक्काम केला. बुधवारी सकाळी ते चौघे जीवधन किल्ल्यावर गेले. तेथून उतरत असताना पाय घसरून दरीत पडल्याने रुचिका जखमी झाली. तिला जुन्नरच्या ग्रामीण रुग्णालयात नेले असता डॉक्टरांनी मृत घोषित केले. ‘तीन महिन्यांपूर्वीच रुचिकाने पीएचडी पूर्ण केली होती. पुढील शिक्षणासाठी ती परदेशात जाणार होती. मात्र, अशातच तिच्या मृत्यूची घटना समजली. आमच्यासह तिच्या कुटुंबासाठी ही अत्यंत वेदनादायी घटना आहे,’ असे ‘आयुका’चे संचालक सोमक रायचौधरी यांनी सांगितले.
