४ मार्च २०२१,
गेल्या काही दिवसांपासून राज्यात गाजत असलेल्या पूजा चव्हाण आत्महत्याप्रकरणात आता नवा ट्विस्ट आला आहे. टीव्ही -९ मराठी ने दिलेल्या वृत्तानुसार या प्रकरणात आता भाजप नगरसेवकाचे नाव पुढे आले आहे. या नगरसेवकाने या संपूर्ण प्रकरणाचे महत्त्वाचे पुरावे आणि माहिती असलेला लॅपटॉप चोरल्याची माहिती समोर आली होती. त्यानंतर हा नगरसेवक गायब झाला आहे. त्यामुळे आता पूजा चव्हाण प्रकरणातील गूढ आणखीनच वाढले आहे.
वानवडीचे नगरसेवक धनराज घोगरे यांनी लॅपटॉप चोरल्याचा दावा आहे. सध्या त्यांचा फोन स्वीच ऑफ आहे. धनराज घोगरे कालपासून घरीच आले नाहीत. याविषयी त्यांच्या कुटुंबीयांना विचारले असता धनराज हे सध्या आमच्या संपर्कात नसल्याचे त्यांनी सांगितले. त्यामुळे आता पूजा चव्हाण प्रकरणात कोणता नवा उलगडा होणार का, याकडे सर्वांच्या नजरा लागल्या आहेत. धनराज घोगरे हे पुणे महापालिकेतील नगरसेवक आहेत, वानवडी वॉर्डमधून भाजपच्या तिकीटावर नगरसेवक म्हणून निवडून आले असून ,पुणे महापालिकेतील शहर विकास समितीचे उपाध्यक्ष आहेत तसेच पूजा चव्हाण मृत्यू प्रकरणात बंजारा समाजाच्या बदनामी प्रकरणी दाखल गुन्ह्यात नाव आहे.
पूजा चव्हाणच्या लॅपटॉपमध्ये काय आहे?
या प्रकरणात सुरुवातीपासूनच पोलिसांनी पूजाचा मोबाईल आणि लॅपटॉप का ताब्यात घेतला नाही, असा प्रश्न विचारला जात आहे. या लॅपटॉपमध्ये संजय राठोड आणि पूजा चव्हाण यांच्याशी संबंधित माहिती असण्याची शक्यता आहे. पोलीस तपास सुरु असताना दुसरीकडे दररोज पूजा चव्हाण प्रकरणातील नवे व्हीडिओ, फोटो आणि माहिती समोर येत आहे. ही माहिती नेमकी कुठून बाहेर पडत आहे, याचा तपास अद्याप पोलिसांना लागलेला नाही. त्यामुळे आता संशयाची सुई धनराज घोगरे यांच्याकडे वळली आहे.
