१६ मार्च २०२१,
खासगीकरणाविरोधात सार्वजनिक क्षेत्रातील बँक कर्मचारी आणि अधिकाऱ्यांचा आज दुसऱ्या दिवशी संप सुरूच राहणार आहे. या संपात देशभरातील जवळपास १० लाख कर्मचारी आणि अधिकारी सहभागी झाल्याने सोमवारी पहिल्याच दिवशी सरकारी बँकांची सेवा कोलमडली. बँकांची सेवा शाखा बंद असल्याने सोमवारी तब्बल १६५०० कोटीचे चेकचे व्यवहार होऊ शकले नाहीत. आज मंगळवारी देखील बँक सेवेवर परिणाम होण्याची शक्यता आहे. त्यामुळे आजदेखील ग्राहकांना एटीएम आणि डिजिटल बँकिंग सेवेवर अवलंबून रहावे लागेल.
सोमवारी संपाचा मोठा परिणाम दिसून आला. मुंबईसह प्रमुख शहरात सार्वजनिक बँकांची कार्यालये संपामुळे ओस पडली होती. काही शाखांमध्ये कामगार संघटनानी केंद्र सरकार विरोधात घोषणाबाजी केली. मुंबईत भारतीय स्टेट बँक, कॅनरा बँक , बँक ऑफ इंडिया, आयडीबीआय , बँक ऑफ महाराष्ट्र अशा कामगार संघटनांची पकड असलेल्या बँका सोमवारी पूर्ण दिवसभर बंद होत्या. त्यामुळे ग्राहकांना मोठा मनस्ताप सहन करावा लागला.
देशातील तीन प्रमुख ठिकाणी चेक क्लिअरिंग , डिमांड ड्रॅाफ्ट आणि पे ऑर्डर्स यांची प्रक्रिया पूर्ण केली जाते. त्यापैकी चेन्नईमधील केंद्रात ५८ लाख चेक आणि डीडी हाताळले जातात. सरासरी ५१५० कोटींची व्यवहार संपामुळे रखडले. तर मुंबईत दररोज ८६ लाख चेक, डीडी आणि पे ऑर्डर्स हाताळले जातात . मात्र सोमवारी ते होऊ शकले नाहीत. मुंबईत जवळपास ६५०० कोटीचे चेक, डीडी आणि पे ऑर्डर्सचे व्यवहार ठप्प झाले.
दिल्लीतील केंद्रात बँकांचे दररोज ५७ लाख चेक, डीडी आणि पे ऑर्डर्स यांची प्रोसेस केली जाते. संपामुळे सोमवारी दिल्लीत ४८५० कोटीचे चेक व्यवहार रखडले, असल्याचा दावा संपत सहभागी झालेल्या कामगार संघटनानी केला आहे.बँकांचा देशव्यापी संप हा केवळ कर्मचाऱ्यांच्या मागण्यांसाठी नाही तर सार्वजनिक बँक वाचवण्यासाठी आहे. खासगी भांडवलदरांपासून बॅंकचे संरक्षण कारण्यासाठी हा संप असल्याचे ऑल इंडिया बँक एम्प्लॉईज असोसिएशनचे जनरल सेक्रेटरी सी. एच वेंकटचलम यांनी सांगितले.
केंद्र सरकारने आयडीबीआय आणि दोन सरकारी बँकांच्या खाजगीकरणाची अर्थसंकल्पात घोषणा केली होती. त्यावरून कामगार संघटना आक्रमक झाल्या आहेत. बँक खाजगीकरणाच्या विरोधात आज सोमवारपासून १२ सार्वजनिक क्षेत्रातील, १२ जुन्या जमान्यातील खाजगी, सहा विदेशी, ५६ प्रादेशिक ग्रामीण बँकेतील दहा लाखांवर बँक कर्मचारी आणी अधिकारी दोन दिवसाच्या संपावर आहेत. या बँका १५० लाख कोटी रुपयांचा म्हणजे एकूण बँकिंग व्यवसायाच्या ७० टक्के व्यवसाय हाताळतात. त्यामुळे बँकिंग क्षेत्राला आज मंगळवारी देखील मोठा फटका बसण्याची शक्यता आहे.
