९ मार्च २०२०
राज्यसभेच्या आगामी निवडणुकीत एका जागेसाठी महाविकास आघाडीत मोठी रस्सीखेच असून एका जागेवरून महाविकास आघाडीला मतभेदाला सामोरे जावे लागेल अशी चिन्हे दिसत आहेत. महाविकास आघाडीच्या वाट्याला राज्यसभेच्या ४ जागा आल्या असून त्यांपैकी आघाडीतील तीन पक्षाला प्रत्येकी एक जागा मिळणार आहे. उर्वरित चौथ्या जागेबाबात महाविकास आघाडीच्या समन्वय समितीच्या बैठकीत चर्चा करून निर्णय घेण्यात येईल, अशी भूमिका काँग्रेसचे प्रदेशाध्यक्ष बाळासाहेब थोरात यांनी मांडली आहे. राज्यसभा निवडणुकीच्या पार्श्वभूमीवर प्रदेशाध्यक्ष थोरात यांनी आज काँग्रेसच्या हंगामी अध्यक्षा सोनिया गांधी यांची दिल्लीत भेट घेतली.
राष्ट्रवादी काँग्रेस पक्षाने पक्षाध्यक्ष शरद पवार आणि फौजिया खान अशी दोन नावे निश्चित केली आहेत. यामुळे जर राष्ट्रवादी काँग्रेस पक्षाला दोन जागा जाणार असतील, तर शिवसेना आणि कांग्रेसला प्रत्येकी एकाच जागेवर समाधान मानावे लागणार आहे. मात्र, राष्ट्रवादी काँग्रेसला दोन जागा देण्याचा कोणताही निर्णय झाला नसल्याचे बाळासाहेब थोरात यांनी स्पष्ट केले आहे. फौजिया खान यांच्या नावाची अधिकृत घोषणा राष्ट्रवादी काँग्रेस पक्षाचे प्रदेशाध्यक्ष जयंत पाटील यांनी झाली नसल्याचे माहिती थोरात यांनी दिली आहे.
राज्यसभेच्या उमेदवारीची माळ कुणाला मिळेल हे सर्वस्वी पक्षाध्यक्षा सोनिया गांधी ठरणार असून उमेदवाराच्या नावाची घोषणा त्या बुधवारी करतील अशी माहिती मिळत आहे. प्रदेशाध्यक्ष बाळासाहेब थोरात यांनी सोनिया गांधी यांच्याशी त्यांच्या दिल्लीतील निवासस्थानी भेट घेत चर्चा चर्चा केली. ही देशाच्या पातळीवरील निवडणूक असल्याने कोणाला उमेदवारी द्यायची हा सोनिया गांधी यांचा अधिकार असून त्यांचा निर्णय आम्हाला मान्य असेल, असेही थोरात म्हणाले.
