१३ डिसेंबर
मंत्रालयाच्या सहाव्या मजल्यावरून उडी मारून एका तरुणीने आत्महत्येचा प्रयत्न केल्याची धक्कादायक घटना घडली आहे. त्यामुळे मंत्रालयात एकच खळबळ उडाली आहे. मात्र संरक्षक जाळीमुळे या महिलेचा जीव वाचला आहे.
आज दुपारी मंत्रालयात हा धक्कादायक प्रकार घडला. काही कामानिमित्त ही तरुणी मंत्रालयात आली होती. मात्र अचानक या महिलेने मंत्रालयाच्या सहाव्या मजल्यावरून उडी मारल्याने खळबळ उडाली. सहाव्या मजल्यावरून उडी मारल्यानंतर ही महिला पहिल्या मजल्यावरील संरक्षक जाळीवर पडल्याने तिचा जीव वाचला. या घटनेची माहिती मिळताच पोलिसांनी घटनास्थळी धाव घेऊन सदर महिलेला रुग्णालयात नेलं आहे.
ही घटना घडल्यानंतर मंत्रालयातील सर्व कर्मचाऱ्यांनी तात्काळ घटनास्थळी धाव घेतली. ही तरुणी संरक्षक जाळीवर विव्हळत असताना मंत्रालयाचे कर्मचारी मात्र बघ्याच्या भूमिकेत होते. काही लोक फोटो काढत होते, तर काहीजण व्हिडिओ शुटींग करताना दिसत होते. पोलिसांनीच घटनास्थळी धाव घेऊन सदर तरुणीला संरक्षक जाळीतून बाहेर काढले. दरम्यान, सदर तरुणीच्या आत्महत्येच्या प्रयत्नामागचं नेमकं कारण समजू शकले नाही. ही तरुणी मानसिकदृष्ट्या अस्वस्थ होती. परंतु, ती नेमक्या कोणत्या कारणानं अस्वस्थ होती, याबाबतचा पोलीस तपास करत आहेत.
