११ जून २०२१,
‘गड तिथे शिवराज्याभिषेक दिन’, ‘गड तिथे शिवस्वराज्यदिन’ या उपक्रमांतर्गत राज्यातील ५१ गडांवर भगव्या स्वराज्य ध्वजासह शिवशक राजदंड स्वराज्यगुढी उभारून ‘शिवराज्याभिषेक दिन’ उत्साहात साजरा करण्यात आला.
प्रत्येक गडांशी निगडित असलेल्या ऐतिहासिक घराण्यांचे वंशज आणि परिसरातील ग्रामस्थ यांच्या हस्ते ही गुढी उभारण्यात आली. या निमित्ताने फुलांची तोरणे, रांगोळ्या आणि तुतारीच्या निनादाने गडांवरील वातावरण शिवमय झाले होते.
पुण्यातील शिवजयंती महोत्सव समितीच्या पुढाकाराने हा अभिनव उपक्रम राबविण्यात आला. शिवस्वराज्यदिन सोहळ्याचे संकल्पक; तसेच शिवजयंती महोत्सव समितीचे संस्थापक अध्यक्ष अमित गायकवाड यांनी ‘गड तिथे शिवस्वराज्यदिन’ ही संकल्पना मांडली होती. या संकल्पनेला राज्यभरातून प्रतिसाद मिळाला. शिवनेरी, तोरणा, राजगड, सिंहगड, रायरेश्वर, तुंग-तिकोना, पुरंदर, रोहिडा, पन्हाळा, रामसेज, संग्रामदुर्ग, लोहगड, रोहिडा, मल्हारगड, विसापूर, चाकण, राजमाची, इंदूरी, मोरगिरी, कोराईगड, घनगड, कैलासगड, तैलबैला, सोनेरी, वज्रगड, केंजळगड, मोहनगड अशा ५१ गडांवर हा सोहळा उत्साहात साजरा झाला. गायकवाड यांच्या मार्गदर्शनाखाली अॅड. मारुती गोळे, रवींद्र कंक, गणेश जाधव, समीर जाधवराव, अशोक सरपाटील, प्रवीण गायकवाड, संतोषराजे गायकवाड, दिग्विजय जेधे, सागर पवार, राजेश सातपुते आणि सहकाऱ्यांनी आयोजन केले होते.
स्वराज्यगुढी राज्याबाहेरही
पुढील वर्षी राज्याबाहेरील ५१ गडांवरही स्वराज्यगुढी उभारली जाणार आहे. सहा जून ‘स्वराज्य दिन’ म्हणून जगभरात पोहोचावा, यासाठी सहा जून २०१३पासून ‘स्वराज्यगुढी’ उपक्रम सुरू केल्याचे अमित गायकवाड यांनी सांगितले.
