७ फेब्रुवारी २०२०
करोना व्हायरसने जगभरात हाहाकार माजवला असून चीनमध्ये आतापर्यंत करोनाने ६१८ जणांचे बळी घेतले आहेत. या आजारावर उपाय शोधण्यासाठी जगभरातील शास्त्रज्ञांनी प्रयत्न सुरू असताना ऑस्ट्रेलियातील अनिवासी भारतीय असलेल्या शास्त्रज्ञाने आपण करोना विषाणूवर लस बनवण्याच्या अगदी जवळ गेल्याचा दावा केला आहे. ऑस्ट्रेलियातील ‘कॉमनवेल्थ सायंटिफिक अँड इंडस्ट्रीयल रिसर्च ऑर्गनायझेशन’च्या एका हाय- सेक्युरिटी प्रयोगशाळेत ही लस तयार करण्यात आली असून इथे संशोधनासाठी सर्व आवश्यक त्या सोईसुविधा उपलब्ध करून देण्यात आल्या आहेत.
करोनाचा संसर्ग झालेल्या एका व्यक्तीकडून या विषाणूचा नमून्यापासून हा विषाणू आयसोलेट करण्यात ऑस्ट्रेलियाच्या डॉर्टी इंस्टिट्यूटच्या संशोधकांनी गेल्याच आठवड्यात यश मिळवले होते. CSIRO मध्ये या विषाणूचा विकास पाहता प्री-क्लिनिकल अभ्यासासाठी विषाणू मोठ्या संख्येने उपलब्ध व्हायला हवेत असा अनुमान काढण्यात आला आहे.
आयसोलेट करण्यात आलेला हा विषाणू आम्हाला दाखवण्यात आल्याचे CSIRO चे पॅथोजन्स चमूचे प्रमुख प्राध्यापक एस. एस. वासन यांनी टाइम्स ऑफ इंडियाशी बोलताना सांगितले. आम्ही डॉर्टी इन्स्टीट्यूटच्या आमच्या सहकाऱ्यांचे आम्ही आभार मानतो. त्यांनी आयसोलेट करण्यात आलेला विषाणू आम्हाला दाखवला आहे, असे प्राध्यापक वासन म्हणाले. खरा विषाणू असेल तर काम जलद गतीने होते आणि प्री-क्लिनिकल अभ्यास करून त्यावर लवकरच औषध तयार करण्याला मदत मिळते, असे वासन म्हणाले.
‘ऑस्ट्रेलियन अॅनिमल हेल्थ’ लॅबमध्ये माझे सहकारी देखील निदान, सर्व्हिलन्स आणि रेस्पॉन्सवर काम करत असल्याची माहिती, वासन यांनी दिली. आमची प्रयोगशाळा या विषाणूंची संख्या वाढवण्याच्या प्रयत्नात असल्याचेही वासन म्हणाले. जगभरात करोना विषाणूवर औषध तयार करण्याचे प्रयत्न सुरू असून त्यावर प्राध्यापक वासन म्हणाले की, ‘प्री-क्लिनिकल अभ्यासासाठी आवश्यक लस उपलब्ध करण्याबरोबर यामुळे आता औषध तयार करण्याच्या प्रयत्नांनाही गती मिळेल.
